Sunday, August 20, 2006

من اربع ساعات بس كنت مخنوقة مش قادرة ابطل كلام .. ركبت عشان اروح كنت ماسكة دموعي بالعافية .. حاسة ان الناس كلها واخدة بالها مني وعايزة اخبي نفسي
دخلت من باب الشقة فتحت الكمبيوتر .. فتحت المسنجر ملقيتش حد اون لاين
وفجأة دخلت انت .. قلبي اتقبض انا المفروض دلوقتي اعمل مش واخدة بالي ومكلمكش لحد الفترة اللي انا حاطاها في دماغي
وفضلت احاول اشغل نفسي وفجأة لقيتني بكلمك .. ازيك .. انا عايزة اتكلم معاك هنا ولا اشوفك .. وبكل برود قلت لي ها
قلت كل اللي عندي .. سالتك كل الاسئلة اللي كنت عايزة اسئلهالك وملقيتش عندك ردود
قلت : انت شايفني انسانة مش كويسة بني ادمة مش محترمة يعني
انت:لاء خالص
انا :طب انا عمري فرضت نفسي على حياتك او خليتك تتعامل غصب عنك
انت:لا
انا : طب عمري غلطت فيك اذيتك ،ضايقتك
انت:لا
طب بتتعامل على الاساس ده ليه كل شوية تغلط واكبر واسكت اية بقى
قلت كل الي في نفسي ... قلت اني لو كنت غلطت المرة دي في حقك فانت غلطت كتير
فجاة لقيت نفسي بقول اني مش عايزاك .. بس بذوق طبعا ما هو اصلي مش بحب اضايقك في بينا عشرة
ايوة اللي بينا عشرة وبس
ودلوقتي حاسة فجاة اني حرة لاول مرة اقولك سلام وابقى عارفة انها بجد
حاسة ان في جوايا حاجة حقيقية غيرك .. الحاجة دي هي انا
تستاهل اني ادور شوية على اللي هي عايزاه .. الي عمره ما كان عندك
حرية رهيبة .. احساس يجنن .. وقلب مفتووووووووووووووووح .. كنت نسيت الكلام ده
من اربع ساعات بس كنت عايزة اعيط .. ودلوقتي عرفت اني كنت عايزة اعيط عشان بزق في حيطة اللي هي مشاعري من ناحيتك
مش قادرة اتنازل عن فكرة انها موجودة .. بس خلاص ..
ماتت .. هييييييييييييييييييييييييييه
هبلة استحملوني .. بس حاسة اني عايزة اقول للدنيا كلها

6 comments:

shimaa said...

yareet meb2sh zy kol mra..yareet yb2a bgd elmra de b2a

LAMIA MAHMOUD said...

شيماء
ان شاء الله جد اصلها افورت منه قوي

Anonymous said...

تعرفى ان عندى نفس الاحساس دة دلوقتى

فعلا حيطة بتزقى فيها بس تصدقى انا لسة اجين من اخد القرار دة مش قادرة

LAMIA MAHMOUD said...

Anonymous
عايزة نصيحتي؟
ولو مش عايزاها حقولها .. خدي القرار قبل ما تبتدي تحسي انك بتضيعي عمرك وانتي بتزقي في الحيطة دي
خدي القرار قبل ما ييجي عليكي يوم تندمي على كل لحظة ما عشتيهاش وعلى كل ثانية مكنتيش سعيدة فيها وكان بس لانك مش عارفة تاخدي قرارك
وجع ساعة ولا كل ساعة

Anonymous said...

بحاول

بس وجع الساعة ممكن يبقى اصعب من وجع كل السعات

ادعيلى اقدر

LAMIA MAHMOUD said...

Anonymous said...
في اوله بس صدقيني انا مجربة
بس لو لقيتي نفسك حتحسي انها تستاهل انك تفوقي عشانها هي اهم حاجة في حياتك
ودوري حواليمي حتلاقي حاجات حلوة كتييييييير
تهون عليكي والله بتكلم وانا عارفة وحاسة ومقدرة
ربنا يعينك