Friday, August 11, 2006

اية اللي مكتفني ومسمرني في الارض ومخليني مش عارفة اخد قرار .. اية اللي بيخليني كل شوية اكلمك اصلا
ما انا عرفت اللي فيها .. واحساسي بيك كمان مش زي زمان خالص .. اية بقى
اية اللي مخليني خايفة احب التاني وبفرمل نفسي عشان ما اروحش
مع اني بفرح لما بشوفه او بسمع سيرته .. بس بردة هو مش انت اية الفرق بقى
جايز عشان لما بتكلم معاك عن اي حاجة واي حد في حياتي بتبقى عارفه .. جايز عشان عارف بحب اية وبكره اية .. عشت معايا حياتي كلها
عارف اني لما اسرح وافكر في حاجة بلعب في السلسلة بتاعتي ، عارف اني لما اضيق عنيا يبقى ناويالك على حاجة ، عارف كمان ممكن تنرفزني ازاي وانت الوحيد اللي بتعرف تنرفزني ، وعارف تدخلي منين .. وبتعرفني لما بكدب وبتقوللي عنيكي فيها كدب .. مفيش ثواني واضحك واقولك كل اللي سألت عليه .. وبعدين استغرب انا برد عليك ليه اصلا .. ما انت ملكش فيه .. وانت بتسال ليه .. احنا خلاص .. او احنا اصلا مكانش فيه احنا عشان يبقى خلاص


بس كمان مفيش حد غيرك ممكن يبقى كل ده .. انت الوحيد اللي فاكرة اصغر تفصيلاته .. لما بتدخل المطبخ وتفتح علبة السكر وتاكل منها بالمعلقة .. ولما تقوللي فينك واقولك معاك وببقى عارفة انك وراها هوا هتقولي على طول .. وعارفاك وانت بتشاور اشارات عجيبة وازاي مبتعرفش تاكل السمك .. لازم حد يقشرهولك او تروح مشوه السمكة بالمعلقة .. وبتمووووووووووت في البطاطس بس لو صنية تبقى على صلصة بيضا .. والشاي سكر كتير ..ولما بتتنرفز معنكدش سيطرة على بقك .. وانت الوحيد اللي معرفش بعملها ازاي دي و انت بعيد لو جرى حاجة تعبت اتضايقت اتخانقت .. بحس بيك وانا مكاني .. واول ما اكلمك اقولك مالك .. وتستغرب عرفت منين دي

بس كل ده خلاااااااااااااااااااااااااااااص .. لازم انساه حالا وافتح قلبي لحد جديد هيقدر ده كله ويفهمه .. الكل فاكر ان الخطوة دي سهلة
بس عشان كل ده .. الخطوة دي اصعب حاجة في حياتي .. اني اشيل من قلبي كل امل اننا نبقى مع بعض وابطل احبك .. وابتدي بقى اكتشف دنيا تانية غير دنيتك .. ربنا يستر عليا

2 comments:

1_masry fe America said...

kaallam Kebier ya lamia

LAMIA MAHMOUD said...

مصري في امريكا
وانا قد الكلام ده .. اوعدك