حوار فاشل جدا

هي ناقصاك انت كمان .. جاي وعايز مني حنان ،ده كان الموبايل بيرن وهي عرفت انه هو
هي: الو
هو: ايوة يا بيبي
هي: مبحبش الكلمة دي وانت عارف .. بتنرفزني
هو:طب معلش يا حياتي انا اسف
تعلو وجهها نظرة من السأم القاتل
هي : انا مش حياة حد
هو: طب صباح الجمال
هي : اهو صباح والسلام
هو: لاء مادام كان على صوتك لازم يبقى صباح الجمال
هي: الهي يكرمك ويعلي مراتبك يارب قادر يا كريم
هو: وحشتيني
هي : متشكرة ربنا يخليك
هو: وده رد وحشتيني .. رد وحشتيني وانت كمان يا قلبي
هي: والله انا قلبي بيوجعني
هو:عشان فاضي جربي تحطيني جواه كده وهو يبطل يوجعك
تضع يدها على فمها محاولة كتم لفظ بذيء كان في طريقه للخروج
هي: انت عايز مني اية .. ما تفكك مني بقى ما انت عارف اني بحب حد تاني
هو: بس الحد ده مش معاكي
هي: فلنفترض يا سيدي .. بس انا مش عايزة حد غيره حاليا
هو : ده ولا حاجة ما يستاهلش بصيلي وبصيله
تخبط رأسها في الحائط منعا لخروج كل الاقوال البذيئة التي تدور في رأسها الآن
هي : انت وهو مش في وضع مقارنة
هو: عشان مش من مصلحته يبقى في وضع مقارنة معايا انا
لم تعد تتحمل ستخرج كل ما حاولت كتمه
هي: انت مين انت اصلا .. انت عيل دلدول ولا حاجة .. كتك القرف في منظرك فرحان باية بفلوسك وعربيتك وشكلك يعني يا ابن................. هو اصلا بقى الضفر اللي يطيره بميه من عينتك .. على الاقل هو راجل ما يقبلش على نفسه يتعامل المعاملة دي ويسمع الكلام ده اكتر من مرة ويعرف ان في واحدة مش طايقاه وبرده يتصل
هو: انا بستحمل كل اللي بتعمليه ده عشان بحبك وعارف ان هييجي يوم وتحبيني
يرتفع حاجباها في دهشة منه عجيب الانسان ده والله .. طب ارد عليه اقوله اية
هي : يا ابني انت ما بتحبنيش .. انت واجعك بس انك واد تجنن وازاي انا محبكش ومموتش فيك ، بس بص انت ممكن تعجب اي حد غيري بس انا ليا دماغ معينة تركيبة كده مش هتعرف توصلها
هو : بس انا عايزك
هي: هي دي الفكرة انت عايزني زي ما بتعوز اي حاجة .. زي ما عوزت تغير عربيتك بعد شهرين وبابا غيرهالك .. بس انا مش هينفع معايا النظام ده
هو: بس انا اقدر اديكي حاجات كتير
هي: يا ابني ارحم نفسك وارحمني بقى .. لا انا عمري ححبك ولا عايزة اللي انت بتقوله ده .. انا كل اللي عايزاه اني احب بجد وبس ماليش في شغل يا بيبي ورايحين بكرة سيتي ستارز وعندنا باربي كيو في مش عارفة فين.. الكلام ده كله مش موجود في قاموس الحب عندي
هو : بس هتندمي كل يوم لان اللي انت عايزاه مش هاييجي
هي : ما يجيش بس ما اعيش طول عمري حياة مش شبهي وخصوصا اني مش بحب التيدي بيرز
هو: انتي بتتريقي عليا كمان
هي: يا ابني انت غريب ليه ما اتضايقتش لمل شتمتك واتضايقت لما اتريقت عليك .. يخرب بيت ام حب الذات اللي عندك .. مش بقولك ما بتحبنيش بتحب تتملك اي حاجة مش بتاعتك وبس
هو : هسيبك تفكري .. يلا باي يا قمر
اخذت تبحث في الغرفة على مسدس عشان تقتل نفسها وتخلص بقى يمكن يهدى
ملحوظة:
الحوار حمضان وفاشل .. بس بيوصل فكرة ان ناس كتيييييييييييييير ممكن تتمسكن قد اية بس لمجرد انها تتمكن