Monday, October 20, 2008

هيستريا



هيستيرية انا وحادة جدا .. احب بعنف واكره بعنف .. اصادق بعنف واقاطع بأعنف

اتحول في الساعة الواحدة مئة تحول .. اضحك جدا ثم اصمت جدا ثم انهار جدا واصارح وبالتالي فطبيعي بعد كل تلك الجدا ان اتحول الى غامضة جدا

لست هوائية فلا تحاولوا نعتي بذلك .. انا فقط .. "انا" .. لا يوجد اي صفة اخرى قد تعبر عني

*********************


بدايات الشتاء والهواجس المتعلقة باصطباغ الهواء المحيط باللون الرمادي المثير .. والرائحة التي تجتاح الهواء والاحساس بأن "الدنيا مغسولة"
كل هذا يبعث على التذكر والحنين و... و... و...


عيد ميلادي قرب تفتكري حيفتكر وحشوفه؟


عيد ميلادي عدا ومشوفتش حد غيرك .. بس على فكرة ده شيء عبقري لما يتواجد معاكي في اول ايام سنتك الجديدة حد بيحبك فعلا وفي نفس الوقت مبيقلبش مواجع .. حد انتي مش شايلة منه وهو مش شايل منك.


كده يبقى برده مش حشوف غيرك

على فكرة بقينا مملين جدا .. قاعدين طول الوقت نجتر في ذكريات نجتر في ذكريات بقينا ولا الجمال .. يا شيخة دي حتى الجمال بيجتروا بهدف احنا بعد كمية الاجترار دي حنعمل اية

حنرجع اللي اجترناه

هو انا معرفش اتكلم معاكي جد ابدا .. جد شوية بقى احنا لازم ناخد موقف

على فكرة احنا مبقاش في مواقف ممكن ناخدها .. احنا خلاص خدنا كل المواقف .. ممكن بقى نبتدي نرجع المواقف اللي خدناها لاصحابها .. نتصل بكل حد خدنا منه موقف ونقوله عايزين نقابلك عشان نرجعلك الموقف اللي خدناه

عارفة ان ده في حد ذاته موقف.. حفهمك يا ستي .. لما نرجع كل المواقف لاصحابها حنرجع معاها الذكريات اللي نتج عنها المواقف والمصاحبة للمواقف بالتالي مش حيبقى في ذكريات نجترها فحنبطل اجترار .. يبقى احنا كده خدنا موقف جديد خالص من ناحية الذكريات

ضحك هستيري من الطرفين

***********************

هي الناس بتتغير ولا بتتحول

الناس لا بتتغير ولا بتتحول هي بس بتقرب وبتبعد .. شوفتي .. سهلة!! اوي

عندي اعتقاد ان لو اي اتنين اصحاب او حبايب اي حاجة يعني حضروا مطرة سوا يبقى حيفضلوا سوا طول العمر

على كده في حاجات كتير في حياتنا انتهت ضد اعتقادك .. عموما اعتقادك في حد نفسه متعة .. استمتعي حتى وان كان غلط

بتحبي تجعلصي الكلام وتحسسيني اني مش فاهمة حاجة مع انه ممكن يتقال عادي

عارفة اننا جوز هايل

لا والله؟

اه عاملين توازن كده .. انتي عندك ايمان راسخ في كل حاجة وانا تقريبا صعب اصدق اي حاجة .. بنقول حاجات مختلفة وكل حد بأسلوبه ومع ذلك لسه فاهمين بنقول اية .. ده حتى يا شيخة انتي شقرا وانا سمرا

والنعمة انتي راااااااااااااااايقة.. جايبة الروقان منين

اول نقط مطرة من سنتين .. والنيل والمطرة والجو تلج وصوابعك جوه البوت نشفت وجورج وسوف بيقولك يا عمري ااااااه يا قلبي انسى .. اسرحي في المشهد ده كده حتروقي

صحة وعافية يا حبيبتي

اقولك .. الحوار ده مصيره حيبقى زي اللي فات بالمللي

انا عارفة اللي بيقرالك الحاجات دي بيقراها ليه

هما فاهمين على فكرة اطلعي انتي منها

*************************

تنتهي الاشياء دائما نهايات حادة

لعنات .. صراخ .. خوف .. قرف .. زهق .. ملل

لتبدأ اشياء اخرى اكثر نعومة

دائما ما اجد فترات التصالح مع ذاتي في أغرب الاوقات .. وانا ومن فترة كنت قد صالحتني وقررت الا اتركني ثانية ابدا .. المتعة الحقيقية هي ان تتحرر .. تتحرر حتى داخل اربعة حوائط .. تستنشق نسيم روحك انت الروح والحرية وجهان لعملة واحدة.. منطقي ان تنجرح واكثر منطقية ان تجرح .. منطقي ان تعاشر وتفارق .. بالتأكيد بكل هذا ستصبح انت

وتستمتع بدفء هؤلاء الذين يحبون حقا .. يهتمون حقا .. ينفذون الى روحك حقا

استرجع من تركتهم لاسباب سطحية فارغة وقد كانوا الى الروح اقرب ..

المغفرة

المغفرة

لا تطالب الآخرون بها الا ان استطعت انت ان تحترفها كبداية

ان تتحرر.. هو ان تخلد الى نومك يوميا وقد سامحتهم جميعا

***********************************

اللوحة هي

contrast

للفنانة

carrie garber