Monday, June 20, 2011

الخروج للرجال فقط


الى كل بنت عاملة .. طالبة .. او حتى ما بتعملش حاجة وبتخرج من بيتهم
لا تركبي المواصلات العامة .. الدواء فيه سم قاتل.. سوري
قصدي بلاها مواصلات وقضيها تاكسيات .. ولا اقولك بلاش تاكسيات كمان .. قضيها كعابي .. ولا بلاش كعابي
يا بنتي اقعدي في بيتكوا وخلصي
ما هو اصل انتي لو نزلتي وركبتي الاتوبيس .. حتلاقي نفسك داخلة في علاقة اقوى من اي علاقة دخلتيها في حياتك .. حد سدغ وبلط وتنح واقف ومتنح ان ما كانش لازق فيكي وقرف ولو مش عاجبكوا اقعدوا في بيوتكوا انا عارف اية اللي خرج البنات اصلا .. كتهم البلاوي .. او يا حلوة اشتري عربية .. وليلتك سودة لو طلعتي جامدة وزعقتي .. تقفي تسمعي ابشع الالفاظ وناس تعلي صوتها وما تلاقيش يا حرام غير انك تنزلي تاخدي بقى تاكسي
تااااااااااااااااااااااااكسييييييييييييييييييييييييييييييي
ايوة يا قمر رايحة فين يا جميل
..................
طب وحتركبي ورا ليه ما تركبي قدام
لاء معلش ربنا يخليك .. بابتسامة لذجة جدا .. بس انتي متاخرة ولسة نازلة من الاتوبيس
سيجارة يا انسة
ولو بتشربي نصيحة تقولي ما بدخنش .. حتوفري على نفسك جزء كبير من المعاناة
اية يا قمر .. متجوزة يا جميل
لاء
ليه
محصلش نصيب
اية ده لسة
على جنب يا اسطى لو سمحت
اية ده احنا لسة ما وصلناش
معلش على جنب هنا حكملها كعابي
وحاولي تفلتي بقى من محاولة مسك ايد ظريفة وانتي بتحاسبي ارمي الفلوس في اي حتة بس ما تديهالوش في ايده
انزلي بقى يا حلوة خديها كعابي
ما هو كان حد واحد بس في التاكسي .. اديكي نزلتي بقى يا حلوة
واسمعي بقى .. ها يا مزة .. وتعليقات يخجل اي لسان عن ذكرها
وان كانت البنت وحشة مع الاعتراض على التعبير ده لان مفيش بنت وحشة .. بس اهي وجخة نظر عقيمة .. تسمع بقى احقر التعليقات اللي بتسيء لنفسية البنت ولو كانت حلوة نفس الكلام عادي
وده كله يا حرام عشان انتي بنت .. فتتمرمطي وما تقوليش لاء .. ولو زعقتي تبقي قليلة الادب .. بنت ايةة اللي تقف تاخد حقها من واحد بيضايقها .. ولو عيطتي تبقي مايعة ..ولو سكتي تبقي متقبلة
مش قلت لك من الاول اقعدي في البيت!!!

Thursday, October 21, 2010

إنها فقاعات لن تلبث أن تنفثئ

لما هي البدايات هي الأكثر إمتاعاً
أمال ليه السيجارة الأخيرة في العلبة ليها قدسيتها
وليه آخر حب هو اللي فاكرين تفاصيله
وليه اللحظة الأخيرة بينا
كانت الأكثر تميزاً؟!
****
مفيش داعي نمثل الحدوتة
مش لازم أبداً تبتسم ابتسامة خفيفة وتبصلي
كمان مش لازم ॥
ابص الناحية التانية ، واعمل مش فاكراك
****
سكوتك مشكلة!
وانت ساكت الدنيا بتفقد وضوحها
وانا قد ما بحب الغيوم
بفرح اكتر لما الشمس بتعرف تغلبها
****
انا دايماً بدور على واحد
يقدر يميز ما بعد ملامح الوشوش
****
ملحوظة : فيه حاجة كده!
****
ضحكتك كانت طول الوقت مهزوزة
وطريقتك وانت بتمد رقبتك وبتعرض نظريات سخيفة
ضحكك لوحدك على افيهات انت اللي قايلها
حاجة تقفل!
****
هو ليه مفيش عمليات استئصال ذاكرة
او ع الاقل
استئصال مرارة
بس م القلب

Thursday, July 15, 2010

عشان كده مش مبسوطة

عذراً لعدم توافر بعض القصص في المدونة لوجودها في مجموعتي القصصية التانية

Saturday, June 19, 2010

من غير حزازيات ومن ضمن كلام كتير


النهاردة وبعد فترة انا قررت اكتب عنك
مش عارفة ليه؟
بس يمكن لأني اكتشفت اني لحد النهاردة انا فاكرة رعشة ايديك
وضحكتك ووشك لما بيحمر قال ايييييية م الكسوف
وبصتك العبيطة جدا وبصتك الوقحة جدا
...
انا عندي سؤال مهم
انت ليه كنت فاهمني أوي كده؟

عملتها ازاي دي يعني
والنغزة اللي في قلبي دي يا ترى طبيعية؟!!
....
على تــكة ومش مظبوووط
....
كتير وانا ماشية في شوارع تشبهلك
بدور عنك وسط وشوش الناس بالغصب
آه بالغصب
وكأني بغصب البني آدمين يبقوا شبهك
عشان وهما جايين من بعيد افتكرهم انت
وازعل لما يقربوا ويطلعوا حد تاني
...
زهقت من علامات بتاخدني لحد عندك
وزهقت أكتر من ارتباطات شرطية بتفكرني بيك
ومن كتر الزهق بسب الدين لكل دول بابتسامة ود
ود مفيهوش أي اصطناع
....
شارعنا الزحمة بمشي فيه اخبط في بني آمين
يخبطوني ويقولولي سوري
وكل مرة يحصل ده
اتمنى ارفع راسي الاقيك انت االلي بتقولي
وانت بتغمز نفس
.....
نظرتي كان فيها شوية غِل
متضايقة منك أوي عشان كنت بتعرف تتعامل معايا ازاي
ومتضايقة أكتر عشان ما اديتش الخريطة دي لحد غيرك
طمعت فيها وخبيتها في درج الترسيحة
مع ابتسامتي وهدية وحيدة
...
أنا النهاردة سألت أميرة
هو انا كنت كده قبل كده؟
ردها مكانش يطمن ع الاطلاااااااق
عشان كده انا ضحكت اوي ومن قلبي
عشان الحاجات الجديدة دايما حلوة
حتى لو حلاوتها ممررة حبتين

....
اللوحة كاري جاربر

Saturday, May 08, 2010






ربما كانت التفاصيل المتشابهة جدا بين البشر تساعدها على التواصل ، فالحنين لا يترك أحدهم في حاله أبدا .. يصبح صرير عجلات السيارة على الأرض محرك نفسي للكثير من المشاعر والمشاحنات الداخلية .. ولا عائق بين أن يثير صرير العجلات في نفسك بعض من رحيق القرنفل وطعم النعناع الأخضر.

مفاجئة دائما هي اللحظة التي تخبرك أن تفاصيلك لم تعد تشبه أي تفاصيل أخرى .. لحظة الغروب من كوبري قصر النيل سيثبت أمامها العديد من البشر وستتجاوزها أنت معلنا عاديتها بل ونمطيتها .. فشكل الغروب لم يتغير أيدا .. الشمس واصطباغ السماء باللون البرتقالي المائل للأحمرار. . لن يحدث أبدا في أحد المرات أن تصطبغ السماء باللون الأخضر عند الغروب .. " يبقى بكرة مش جي أخضر"

كل الاشياء تشابهت عندهم واختلفت عندك .. أم أنك من الأساس لم تعد تراها؟!
أنا .. أنت .. واحد في العديد من الاشياء بطريقة تجعل التعامل بيننا شِبه مستحيل .. أبدأ بي لإحساسي بتفردي وتبدأ بك لإحساسك بتفوقك .

تمنعني الآن رؤيتي للأشياء من الكتابة .. تصيبني حالة من العطل الكتابي الغير محببة إلى قلبي فاسخط واشعر بالحساسية المفرطة تجاه الأشياء والأشخاص والسخط لأني لم أعد أرى منظورهم أو أنقله على سطوري

فقط امتص الحزن وحدي كلما ايقنت أن الغد بالفعل أتي وأنا مازلت في انتظاره .. بهذا أكسر شعاراتي العديدة التي تنادي باللاإنتظار وأكسر المنطق وأنا انتظر شيئ موجود .

امتص الحزن أكثر كلما تيقنت من اللحظة التي سأرى لك فيها صورة تقف مبتسما فاردا قامتك النحيلة شابك لأصابعك في أصابع فتاة لا تشبهني في أي شيء .. سترتدي انت ربطة عنق سخيفة تشبه ربطة عنق عماد حمدي في اذكريني .. وسترتدي الفتاة شيئا واسعا جدا بلا ملامح وغطاء رأس أسود ليبرز بياض وجهها الشديد وهي تبتسم ابتسامة معلقة لتبدو مفرطة في الخجل والأدب .. وأمعن في حزني بعد أن أرى صورتك وحيدا مرة أخرى ففي مشاجرة ما نعتتك الفتاة الخجولة بألعن الألفاظ التي يعف عنها لساني وربما لسانك .

ويقتلني الحزن حينما أعرف أن سطوري لم تعد مجدية وأن حالة العطل الكتابي ربما ستستمر .. تيقنت من ذلك بعد أن قرأت السطور المتتابعة السابقة والتي تبدو كخريطة عير موفقة لنفسية شاعر متجول وحيد لا يرى في الغروب والنعناع الأخضر إغراءا.

..............
The painting 4 Joseph Lorousso

تعالوا نتكلم سوا:)

الثلاثاء 11 مايو

فى ندوة مكتبة مؤسسة المرأة الجديدة للاسبوع الثاني من شهر مايو تصحبنا لمياء محمود معها فى المقعد الخلفى مجموعتها القصصية التى تتناول العديد من القضايا الهامة، كيف نتربى، كيف تتطور أفكارنا وأحلامنا، جراحنا الأولى، اخفاقتنا المتكررة، العنف الذى نتعرض له يوميا كنساء حتى داخل منازلنا، الفضاء الذى من المفترض أن يكون الأكثر أمانا، ولكن لماذا يسحب هذا الأمان منا ؟؟
مجموعة قصصية تفتح العديد من القضايا وتُخرج فى وجوهنا اسئلة ملغومة أتمنى أن تجيب هذه الندوة عن بعضها.


،،،،،،،،،،،،،،،،،،،،،،،،،،،،،،،،،،،،،،،،،،

موعدنا: الثلاثاء، 11 مايو ، الساعة الخامسة والنصف مساء
المكان: مكتبة مؤسسة المرأة الجديدة
العنوان: 14 عبد المنعم سند متفرع من شارع رشيد أحمد عرابى المهندسين بجوار معرض جنيدى قريب جدا من مستشفى الشرق


مستنياكوا جدا :)

Monday, February 08, 2010

توقيعي يا بشر

صباح الجمال
حفلة توقيعي بقى
في المقعد الخلفي
الجمعة الجاية الساعة 4
معرض الكتاب .. صالة 3
الدور التاني .. جناح دار أكتب
حستناااااااكووووووو
متتأخروش
هاه؟!
:)

الجمعة 12 فبرااااااير

Sunday, January 31, 2010

الكتاب نزل :)


في المقعد الخلفي
مجموعة قصصية
حاليا في صالة 3 علوي
جناح دار اكتب
بمعرض الكتاب