يوم من عمري

قفشت معايا اكتب يوم من الايام بتاعتي اللي بقضيها .. اهو اي هيس والسلام

ولان انا من الناس اللي ايامها طويلة جدا لاني مش بحب انام (نمشيها مش بحب)المهم نبتدي من مثلا الساعة 8 الصبح النهاردة

خرجت من باب اوضتي اللي انا معتبراها صومعة مبخرجش منها الا فيما ندر وللضرورة القصوى ،لقيت ماما جهزت عشان تنز ل الشغل مكنتش حسيت انها صحيت اصلا .. كنت متوجهة للمطبخ عشان اشرب فعديت من قدامها(مع الاسف)فبدأت تتخانق معايا على موضوع انا مش فاكرة عنه اي حاجة الصراحة بس واضح انه شيء مهم اللي يستدعي الخناق الساعة 8 الصبح ما علينا ، بعد ما شربت قررت ادخل احاول انام على ما ماماا تنزل ده غير اني كان بقالي 3 ايام ما نمتش اصلا فالنوم هيكون شيء صحي ومفيد بالنسبة لي جدا

صحيت من النوم بعد ساعة ، الساعة دلوقتي 9 وربع .. مفيش اي حد في البيت غيري ، رحت للتليفون اتصلت بماما في الشغل .. ايوة فين بابا ..نزل يقبض المعاش وبعد كده هيروح المستشفى .. تيت تيت تيت .. (دي الحرارة لان من عادات ماما انها تقفل من غير ما تقوللي مع السلامة) تخيلوا الاحراج لو في مكان عام ومعايا ناس بقى يلا

قررت استمتع بمزايا القعاد في البيت لوحدي كلها وبما اني معايا لحد الساعة اربعة ونص مثلا من غير بني ادمين يبقى هايل براحتي بقى

قمت شغلت الكمبيوتر وشغلت كل الاغاني اللي فيه حطيتها في الميديا بلاير .. عليته على اخره وفتحت المسينجر وساين ان وسيبته

انا دلوقتي في المطبخ بعمل احلى فنجان قهوة ممكن حد يشربه .. على ميه ساقعة وبن محوج تحفة من باب اللوق،خلصت عمايل فنجان القهوة

دلوقتي واخدة الفنجان ورايحة عند الكمبيوتر .. مفيش حد اون لاين ما هو مفيش حد زيي خفاش ليلي ونهاري ايضا..عملتني ابير اوف لاين عشان لو حد رخم دخل ما يتكلمش ولو حد بحبه دخل اكلمه،قعدت على السرير مع فنجان القهوة وكتاب والاغاني لسة شغالة باعلى صوت ومحمد منير عمال يقول عنيكي تحت القمر ، سرحت من الكتاب في الاغنية وافتكرت بني ادم عزيز عليا قوي ولقيت نفسي قاعدة لوحدي ببتسم زي الهبلة ،حمدت ربنا اني قاعدة لوحدي(ما هي لو ماما هنا وفتحت باب الاوضة صدفة ولقيتني ببتسم لوحدي هتقولي فيه اية يا حبيبتي مالك يا بيضة واحتمال تقلب بخناقة)

فنجان القهوة خلص سيبته على الترابيزة وكملت قراية ،دخل عمر من لبنان اون لاين واد مز ، قمت كلمته ومن مميزات عمر وهو شاب لبناني عايش في ايطاليا انه مش بيتكلم الا وهو مشغل الكام وانا بتفرج والله فرجة بريئة (نعمة ربنا) وحمدت ربنا لان لما بيكون في حد معايا كل ما حد يقرب من باب الاوضة بضطر اقفل حوار عمر او احط حاجة فوقيه.. اتكلمنا ساعة وراح جامعته

الساعة دلوقتي 11ونص قمت اعملي كوباية شاي وكالعادة لسعت ايدي من البخار وبتحرقني مووووووووت لحد حالا

التليفون رن خدت الكوباية ورحت ارد،سلمى بنت عمتي على التليفون قعدت تحكيلي على الراجل اللي هتتجوزه وجابلها اية وازاي عمتي خنقاها ومش عارفة تنزل تقابله وازاي الكل عمال يعتب عليها عشان هي مطلقة دلوقتي ومش عارفة مين قالها عيشي لعيالك واكنشاف رائع اكتشفته ان سلمى اللي كانت صاحبتي رغم فارق السن وكانت مسنداني في كل تحركاتي ومبادئي مبقاش ليها اي علاقة بالمبادئ ومبسوطة ان العريس غني جدا بغض النظر عن فكرة الحب بلا هبل،خلصنا انا وهي التليفون لمدة ساعة ونص

الساعة دلوقتي 1 دخلت اميرة صاحبتي اون لاين واتفقنا نتقابل النهاردة بعد الكورس بتاعها،ازيك يا جميل ..ازيك يا بت.ز اية نظامك النهاردة ..ما ورييش حاجة .. خلاص نتقابل بعد الكورس.. اشطااااااااااااااااااااااط..باي .. باي

جت تاني اميرة ..انتي يت بت .. نعم ..تيجي نقعد على البورصة .. اوك ..كلميني بقى الساعة 6..عنيا ليكي

دخل الشاب الفتاك اللي كنت بحبه زمان وكنا مرنبطين حبة ولاد ناس بتاع نص عمري مثلا .. ازيك ..تمام (اصراره العجيب على انه يقول تمام مش الحمد الله) ما علينا .. اخبارك يا باشا .. زي الفل .. هشوفك النهاردة .. ان شاء الله ... وكمعظم حوارتنا سوا قاللي برب.. اوك.. وفجاة هو مش اون لاين(يبقى جاله شغل او مزة) ما علينا

بعده وش دخل الشاب العبقري اللي انا معجبة بيه الايام دي وهو كمان ولسة مش عارفين حنحب بعض ولا خلينا اخوات احسن .. ازيك.. زي الفل .. عامل اية .. الحمد الله (ولا مرة قلت له ازيك وقاللي الحمد الله وبعدها سالني وانت )مش مشكلة،قعدنا نرغي كتييييييييييييييييييير وكلامنا كله مش مفهوم بنتكلم عشان نتكلم مش عشان في حاجة نقوله.. هو حظ امي كده،عادي

الساعة دلوقتي 3 قمت اطبخ عشان ماما تسيبني انزل من البيت من غير ما نقعد نحكي في حكاية انتي مبتعمليش حاجة وانت بتعملي حاجة وكده ..

خلصت طبيخ .. ماما جت .. اكلنا في صمت .. قمت لبست ونزلت..الاول هشوف الشاب الفتاك اللي كنت بحبه

انا دلوقتي معاه .. ازيك يا ..........................ازيك يا لميا.. تريقة وتهريج ويحرق في دمي وارد عليه وده الطبيعي بتاعنا .. جملة عبقرية قلناها احنا ال2 مرة .. انا بحب انرفزك قوي ..انت الوحيد اللي بتعرف تنرفزني كده ..ببقى في قمة سعادتي لما بنرفزك..ببقى مخنوقة وفي نفس الوقت مبسوطة .. (ماسوشية عجيبة) سيبته ومشيت

تاكسي .. قابلت اميرة وكان معاها اسلام(صديق)عرفت ان شيماء جاية وده شيء هايل مع ان احنا التلاتة كل يوم مع بعض اصلا بس ده شيء هايل جدا يمكن الحاجة الوحيدة اللي ماشية صح في حياتي

شوية وياسر جه(صديق)بردة زي اللي قبله ما احنا مقضيينها صداقة والله بالدنيا

ماما اتصلت على الموبايل زكبنا روحوا الحدايق وركبوني تاكسي من هناك

التاكسي طول الطريق مشغل شريط اصالة الجديد وصباحه تقطيع على اصوله .. على ابوه بحق ربنا

وصلت البيت .. خناقة على باب البيت (دي ماما)دخلت خناقة تانية (ده بابا) قلت له انا لسة سامعة الكلمتين دول قاللي مش مشكلتي وقالهم تاني

لحد دلوقتي انا قدام الكمبيوتر بكتب يوم ممل ملوش لازمة في الحياة .. وبشرب شاي

باي باي

تعالوا زورونا