Monday, August 07, 2006

لأنك مش كداب

سيبك من اي حاجة فاتت او اي حاجة حصلت ،كانت في بينا ايام حلوة كتير وعيشت معاك ايام بجد حلوة ، بس كان فيها ايام حلوة قوي ومش قادرة انساها.. مواقف معلقة معايا قوي.
فاكر لما ................ وقع بينا ، كانت كل غلطتي وقتها اني خبيت عليك عشان مش عيزاك تخسر حد بس هو حسبها عليا نقطة وراح قالك ، يومها اتعصبت عليا وغلبت اتحايل عليك واصالحك وانت رافض تسمع اي كلمة ..جيت لك لحد عندك ووقفت قدامك اسمع كلام لا يسر عدو ولا حبيب .. بس هو ده انت لما بتتنرفز مبيبقاش عندك سيطرة على بقك .. وقفت ساكتة لحد ما خلصت كلامك كله .. ومشيت .. الحلو مش في ده .. بعدها لما كلمتك ، قلت لي اتاخرت ليه في الاتصال قلت لك كنت خايفة اسمع نفس الكلام .. انت:وانا كمان كنت خايف .. انا : من اية؟! .. كنت خايف ما تتصليش تاني.. حسيت يومها اني طايرة وصدقتك .. لأني عارفة انك مش كداب ،جايز يكون فيك عيوب بس الكدب مش واحد منها .. ما بتقولش غير اللي جواك ... وطول عمرك معايا مش مجبر تقول غير اللي جواك .. كان لازم اصدق لأنك مش كداب.
الموقف التاني اللي بردة حبيتك فيه قوي .. لما اتهبلت وزهقت من اسلوبك معايا ورحت كنت هاعرف حد غيرك وجيت قلت لك .. في حد تاني يا .......... وانت قلت لي براحتك .. وبعدت عنك .. بعدها وانا بكلم اختك ..سألتها:هي لميا اللي معاكي؟.. قالت لك اه .. ولما خدت سماعة التليفون قلت لي انا محتاجلك .. ملعون ابو الدنيا تولع كلها واولع انا نفسي بس انت ما تحتاجش لحد وما تلاقيهوش .. وسبت كل حاجة وجيت لك .. ما انا كده كده كنت راجعة عمري ما فكرت اني بتاعت حد غيرك .. حتى لو انت بتتعامل غلط قوي وهو بيتعامل صح قوي ، الايام اللي بعدها كانت تحفة فضلت غيران ومقلق .. لما خرجنا انا وانت ومروة صاحبتي وقلت لها بعد ما وصلتنا خلي بالك منها اوعي تخليها تشوف حد كده ولا كده .. اية ده .. ده انت بتغير بقى .. وصدقتك لأنك مش كداب.
فاكر لما كنت هعزل .. كنت زعلانة قوي اني هسيب المكان اللي انا وانت فيه سوا .. كنت حاسة ان ده هيبعدنا عن بعض .. كنت خايفة .. وآخر مرة اشوفك فيها قبل ما اعزل معملتش حاجة غير اني قعدت اعيط .. دموعي اللي عمر ما حد في الدنيا غيرك شافها .. وانت قعدت جنبي وقلت لي بس كفاية والله لو ما بطلتي هعيط معاكي وعينيك دمعت .. وسكت لأني حسيت قد اية انا مهمة عندك .. وصدقتك لأنك مش كداب.
لحد ما وصلنا لمفترق طرق .. وكان لازم ابعد ، كنت مجبرة اسيبك تختار .. عايزني في حياتك ولا لاء من غير ما تكون مجبر .. بس كنت بموت في اليوم ميت مرة ما نسيتكش لحظة .. كنت حاسة ان مهما حصل هترجع تاني .. ما هو محدش حبك قدي ، ولا فهمك قدي ، معتقدش ان كان فيه حد تاني في الدنيا عنده استعداد لو قلت له انا رايح مشوار يمكن اموت فيه(بعد الشر عليك) هيقولك اقعد انت واروح بدالك غيري.. مش كلام والله ربنا يعلم اني كنت ابيع روحي عشانك ..
لحد ما رجعنا نتكلم .. لقيتك بتقول انك مش فاكر كل اللي كان بينا ... ولا حاجة منه .. لقتيك بتسألني هو احنا يعني كان في بينا حاجة قوي :(
قلت انك مش فاكر .. وصدقتك لأنك مع الأسف مش كداب.
وهنا كانت اخر احساس جوايا .. آخر علاقة ليا بالمشاعر بتتقفل

2 comments:

shimaa said...

بعيد عن المواقف اللي انا عارفاها كلها تقريبا ..نقطك كترت اووي
حاسة اني عايزة اكتب الاسامي بدل النقط ديه ..ممكن؟

LAMIA MAHMOUD said...

شيماء
بلاش عشان الرقابة .. لو وقع في ايد حد نروح في توكر