Thursday, September 14, 2006

بقالي كتيييييييييييييييير حاسة ان في حاجة بتتغير فيا ومكنتش فاهمة اية هي .. النهاردة اعز اصحابي قالت لي كلمة عرفت منها اية اللي متغير
او اية اللي كان متغير
انتي شكلك لميا
يعني اية
عنيكي شكلها لميا
عشان من غير العدسات يعني
عشان من غير حاجات كتير
ركزت في كلامها اكتشفت انها معاها حق انا بقالي كتير بلاقي لميا اللي كنت قافلة عليها لسة حفرح بصيت لها
لمعة الحزن اللي في عنيها .. انكسار ساخر .. ملامح وتعبيرات بقالي زمن ما شوفتهاش في عنيها
فترات كتير عدت سوا .. ضحكنا وهرتلنا .. وزعلنا .. وعيطنا
عرفت انواع حزنها واشكاله
وعرفت ان اصعب نظرة حشوفها في عنيها هي نظرة الفقد المصحوب بمحاولة هزيلة للتماسك
ياااااااااااااه فد اية الوقت اللي عشناه سوا
والايام اللي عرفناها .. والايام اللي عدناها .. وكل مرة كان بينتهي بينا الوقت بنضحك على الدنيا .. او سايبينها تضحك علينا
مرة واحدة شفت في عنيها نظرة الفقد دي .. وحسيت بالعجز مفيش في ايدي حاجة اعملها .. ولا حاجة حقولها حتصلح حاجة
والنهاردة اترعبت .. شفت نظرة قريبة منها ..
لمعة حزن .. نني قزاز بيحاول يهرب او يستخبى يمكن يخبي .. بس برده في النني ده فيه شرخ شوفت حاجة
وانا مروحة وقفت بصيتلها .. سلمت عليها من بعيد .. كان نفسي ما امشيش واخدها في حضني .. كان نفسي
كان نفسي اقولها انت النهاردة حاسة ان انا لميا .. وانا النهاردة حاسة انك مش هنا

22 comments:

Amira Hassan said...

من الواضح يا لميا اني هفضل مش هما فتره طويله

اصل هنا بقى قاسي اوي...

بس الغريب انك تكتبي انك شفتي في عيني الفقد و انا بكتب بوست اسمها مرارة الفقد

LAMIA MAHMOUD said...

عشان احنا سنييييييييييييييييييين
مش حقول عشرة سنين احنا السنين نفسها

Polka Dotted said...

7awly teraga3y lamia tany
di a7la 7aga fiki :)

littilemo said...

دنيا بقه

مفلس افندى الرايق said...

مالكم انتوا بتودعوا الدنيا ولا ايه بالفقد اللى انتوا فيه ده

موضوع جميل يا لميا

LAMIA MAHMOUD said...

بطابيط
ربنا يخليكي ليا يا جميل .. ادينا بنحاول كلنا

littilemo
فانية

مفلس افندي الرايق
مش مسالة توديع دنيا .. في الطريق بنودع ناس وبنخسر حاجات وكل شيء بيمثل فقد في حد ذاته .. شكرا

الســـاحر said...
This comment has been removed by a blog administrator.
الســـاحر said...
This comment has been removed by a blog administrator.
الســـاحر said...

على فكره ممكن تلاقى واحد احساسه عالى بس مش بيعرف يعبر..او واحد طريقته فى الكتابه جميله واسلوبه ضعيف..لكن ان يجتمع الاتنين معا دى حاجه جميله اوى ودة اللى انا لاقيته فى المدونه دى ...ربنا يوفقكك

LAMIA MAHMOUD said...

الساحر
ربنا يخليك مجاملة جامدة جدا .. شكرا قوي

ody911 said...

أنا هعيط يا لمياء
مش هقدر على الكلام إللى مليان أحساس دة
هدوا اللعب شويه لحسن دمعتى على مفيش
هتنزل لو حد قال أى حاجة
أودى

LAMIA MAHMOUD said...

ody911
مش عارفة تريقة ولا جد .. بس شكرا انك قريت .. وهاخده على انه جد

مـحـمـد مـفـيـد said...

عزيزتي اميره
كل عام وانتي بخير واتمني ان تتخلصي من حزنك قبل رمضان
وعجبني جدا جدا تعبير (لمعة الحزن اللي في عنيها .. انكسار ساخر .. ملامح وتعبيرات بقالي زمن ما شوفتهاش في عنيها)
قمه الاحساس العالي

LAMIA MAHMOUD said...

محمد مفيد
بالنسبة لاميرة معنديش استعداد اسيبها كده لحد ما رمضان ييجي .. حتفوق ان شاء الله .. وميرسي جدا على موضوع الاحساس ده

الســـاحر said...

لا شكر على واجب..دا الحق لما اشوف حاجه حلوة اقول عليها...وانا كتبت حاجه جديدة يارب تعجبك

LAMIA MAHMOUD said...

الساحر
شكرا بجد .. وهادخل اشوف حالا ومتاكدة انها حتعجبني

ody911 said...

جد الجد يا لمياء
أنا بالنسبة للأحاسيس دى بفهمها بجد لآنى تعبان من الأحساس الزايد
إللى بيخنق أوقات
وعادى بقة
أودى

LAMIA MAHMOUD said...

ody911
عموما الاحاسيس الزيادة حلوة لما تقراها بس .. مؤلمة جدا لما تكون انت اللي حاسسها .. شكرا مرة تانية

We2am said...

eh ya gma3a ma tehdo keda w tesalo 3 nabe el 3arabe..faqd eh bas..ya amira hena a7san lama tekabare dema3'ek..ya lamia eslobek gamed..w bardo kabare dem3'k..el faqd mara wa7da fel 3omr..kefaya

LAMIA MAHMOUD said...

وئام
فل يا معلم ..الله يخليكي مش اجمد من اسلوبك يا قمر

saso said...

عارفة احساسك ده
حين تفاجئين وجة ما في المرآه تقفين
وجه قديم مستعاد.. حتي لتتسائلين اين كنت من قبل
بس الوجه دايما في حاجه نتغيرة وانت بس اللي شوفتيها
لمحه الحزن اللي ناويه تتصاحب علي ملامحك علي طول
بتعيش بيها والغريب بتضحكي بيها
لميا باحييكي بجد ع اللقطه واحساسها اللي وصلنى من اول سطور

LAMIA MAHMOUD said...

saso
شكرا على زيارتك واتمنى انك تكوني فاهمة الاحساس بس .. ياريت ما تكونيش حساه ولا تحسيه عمرك