Sunday, September 24, 2006

كبرياء

دخل الى المكان يبحث عن عينيها .. هنا يلتقون كل فترة .. اتأخرت كعادتها .. هو يعرفها جيدا تعشق ان تتركه في تلك اللحظات القلقة التي يقضيها من وقت وصوله وحتى تشرق هي
شرد .. ارتفعت صورتها لتملأ مربعه الذهني .. لم يعرف يوما ماذا يعني مربعه الذهني ولماذا لا يكون مثلثه او مستطيله .. لماذا دائما يقولها هكذا .. مربعه الذهني
للمرة المئة بعد المليون امسك بنفسه متلبسا بالتفكير مثلها .. كلما علت صورتها ذاكرته وجد نفسه يفلسف كل شيء مثلها
لقد تأخرت عن موعدهم نصف ساعة كاملة سيغاذر ولن ينتظر .. من تظن نفسها لينتظرها ... نعم سيغادر ........... فقط اذا تأخرت نصف ساعة اخرى
رآها آتية من بعيد .. تسير متمهلة وكأنها تملك وقت العالم كله


ازيك

ازيك .. انتي


متواجدة .. عايشة


بتعملي اية في حياتك


احاول التواصل مع ما تلقيه علي الحياة من افيهات حمضانة


مش فاهمك

هي ضاحكة .. واية الجديد

يكره نظرات اللؤم في عينيها .. احيانا يشعر انها تحادثه مسيطر عليها شعور انها الانثى الوحيدة على وجه الارض .. هو من جعلها ترى هذا في نفسها .. سيقول كل هذا لها اليوم..يكره تعاملها مع قلبه كطفل ضال الطريق تحاول دائما ان ترشده الى الطريق العكسي بعيدا عن قلبها


فجأة وبدون اي مقدمات .... انا بحبك


ما انا عارفة


وردك؟


انت بتحبني غلط .. طريقة حبك ليا غلط .. مش هعرف امشي بيها


وحضرتك عايزاني احبك ازاي عشان تعرفي تمشي


انت بتقول انك بتحبني .. يبقى انت اللي لازم تعرف انا عايزة اتحب زاي .. مش حرسم لك خريطة توضيحية


انتي مغرورة


كانت تعرف جيدا ان تلك اول كلمة ستخج من فمه بعد هذا الحوار..تكره ذلك الاسلوب به لو توقف عنه لحظة لسقطت اسيرة ملك يمينه .. ولكنه يشبها في كل شيء .. يضعف امامها ولكن بكرامة .. قاله لها مرة عندما كانت تحب .. اراكي تضعفين اماهه ولكن بكرامة
هو ايضا يملك نفس الطبع .. يظن ان كرامته جرحت الآن وانه لايملك وسيلة للدفاع عنها الا الرد باهانة


ضحكت كثيرا


بتضحكي على اية ؟.. انت بتحبي تنرفزيني


بضحك عشان كنت مستنية عايزة اعرف حتغلط امتى من اول ما بدأت الكلام

حغلط؟


بتحبني غلط .. انا مبحبش حد يهيني وانت بتطلب حبي وكانك بتجبر خاطري


مش فاهمك


يعني ممكن بدل ما تقولي بحبك .. تقولي انا اتفضلت عليكي وتكرمت وملئت بك ذلك الكون السرمدي المسمى قلبي .. وده شرف ولازم تحبيني


انا ما بعملش كده انتي اللي بجد مغرورة


انا بعشق نظرة الحنان اللي بشوفها في عينيك .. بحب احساس القلق اللي بيوصلي من صوتك لما بكون تعبانة .. نبرة الحزن اللي بتملا حياتك لما بتضايق


طيب وفين المشكلة


بكره اول كلمة بتطلع من بين شفايفك لما انت بتتضايق مني


صمت .............. صمت ................... سكون


وكالعادة .. وككل مرة اثار احدهما ذلك الحوار .. نفس النهاية .. اصدقاء الى الابد وبدون اتفاق ظاهر .. هو اتفاق غير معلن على ان يكون ما بينهما نوع من انواع الحب .. نوع خلقوه من بين مشاعرهم هم .. احساس بملكية كل منهم للآخر دون ان يجروء احدهما على الاعلان او البوح .. في داخله يقين انه مهما طال الزمن هي له وهو لها .. وفي داخلها هي تعلم جيدا انه ابدا لم يكن شخصا عابر او عادي في حياتها
فهو ................هو .. لا كلمة قد تعبر عنه الا هذه
انه .... هو

29 comments:

Dr. Tantawy said...

جميلة و متألقه كالعاده

لكن فيها شويه كلاكيع كده عايزه تتضبط هههههه
اهي دي فايده انهم بيدونا علم نفس

:) بانتظار المزيد

مفلس افندى الرايق said...

فكرك عالى قوى وعجبتى بجد

انتى جميله يا باشا ديما

كل سنه وانتى منورانه

مـحـمـد مـفـيـد said...

في منتهي الروعه
احييكي جدا

littilemo said...

اه وجغتى قلبي منك لله

LAMIA MAHMOUD said...

dr.tantawy
شكرا .. وارحب باي تظبيط او تعديل لاي كلاكيع معجبتكش
كل سنة وانت طيب


مفلس افندي الرايق
ربنا يخليك .. دايما كده بتحرجني


محمد مفيد
انت بالذات لما بتقول حلوة بتبسط قوي لانك عبقري اصلا


littilemo
سلامة قلبك
كل سنة وانت طيب

shaimaa said...

to7fa ya bnty bgd to7fa mooooot >>ngmk b2a fe el3ale ya gameel

LAMIA MAHMOUD said...

شيماء
هيييييييييييييييييييه
هيه هيه
انتي بس اللي بترفعي معنوياتي

Amira Hassan said...

مش قادره اقول غير



عبقرييييييييييييييييي

LAMIA MAHMOUD said...

اميرة حسن
ربنا يخليكي يارب .. دايما كده رافعة من معنوياتي بس حاسبي اتنفخ

مـحـمـد مـفـيـد said...

ربنا يخليكي يا ستي ده من بعض ما عندكم وانا لا عبقري والا حاجه ولو انا عبفري يبقي انتي ايه؟
شكرا لكي جدا

LAMIA MAHMOUD said...

محمد مفيد
ده بجد والله ومش مجاملة خالص
كل سنة وانت طيب

Violena said...

جميلة لمياء ..

محيرة .. ومؤلمة أيضا
الحب بالندية

هل تؤمنين حقا أن الحب قد يتحول يوما إلى صداقة؟؟

كلمه said...

2eh ya m3lm elposts elgamda de ..... 3agabny esra7a m3 eno mesh leya :D

we2am said...

فهو ................هو .. لا كلمة قد تعبر عنه الا هذه
انه .... هو
منتهي الكلام....انه هو..و منتهي الصمت..انه هو..منتهي العبقرية..انك انت!!

LAMIA MAHMOUD said...

فيولينا
الصداقة هي الحب بعد ان انكسر جناحاه

الصداقة في الحالات دي مجرد ستار ليستمر وجود كل منهم في حياة الاخر




كلمة
ولا ليا على فكرة .. بس كويس موت انه عجبك



وئام
دي حقيقة في ناس متقدريش نقوللي عنها حاجةغير انها هي
هو .......... هو
شكرا يا معلم على موضوع العبقرية ده الهي يكرمك

saso said...

تحفه طبعا
عارفة مرة واحده صاحبتي قالتلي جملة( بحبه طول ماهو بعيد بحبة لحد ما اشوفة او امع صوتة وقتها بتغير بينرفزني ويحزنني ويبعدني من اول كلمه مالك؟ اللي دايما بيقولها ) افتكرت كلامها من كلامك
علاقة وسط مابين الحب والصداقه بس كلامك عنها بجد جميل يا لميا

الســـاحر said...

الله عليكى وعلى جمال الحوار الرائع ..الرائع
وعلى والله انا مش ببالغ
الحوار كان بيشدنى اوى اوى
ربنا يوفقك

LAMIA MAHMOUD said...

ساسو
عارفة انا حوار بحبه طول ما هو بعي واول ما اشوفه بيبقى ياريت تسكت شوية .. بتحصل
ربنا يخليكي يا جميلة .. انتي اجمل


الساحر
الله عليك انت يا باشا

زعرورة said...

شعور متناقض عجيب ان تقضى ايامك (عاااادى جدا ) وتعلم جيدا انه هناك (من هو ) دائما (على موعد معك) ولو بعد ..

حين..

حين تتمنى قربه كلما طال الوقت وتتمنى قتله كلما كنت بقلبه..


نادرا مااقرأ سطورا أشعر اننى من سطرها .

كل سنة وانتى طيبة :)

LAMIA MAHMOUD said...

زعرورة
بعض العلافات معقدة الى درجة لا يمكن وصفها .. ولا يمكن اعطاء العلاقة مسمى فهي لا تحمل مسمى واحد بعينه فهي كزيج من عدة مشاعر .. فالمشاعر هي التعقيد نفسه

Diyaa' said...

حلوة جدا و انا بمر بتجربة زي دي بس البنت شرقية و متربية زيادة فبتتكسف حتي تقولي انها بتعزني و بتقدرني بس تصرفاتها باينة
و هيا مخطوبة دلوقتي و فرحها الصيف الجاي و انا كنت يومها أسعد واحد في الدنيا لما عرفت و احتمال أموت من الفرحة يوم فرحها
تعبير هايل عن مشاعر هايلة بس هيا فعلا البنت مغرورة حبتين ...هي البتا دي أنتي ؟ :$
باقي التعليق هتلاقيه في البوست اللي بعد ده
انتي تحفة

LAMIA MAHMOUD said...

ضياء
لاء يا سيدي البنت دي مش انا
الموضوع كله حالة اصلهم قعدوا يقولوا انتي ظالمة الرجل والحبيب ومبهدلاه ومخلياه على طول خاين
فقلت اجيب صورة البنت فيها غلطانة شيء ما
وربنا معاك واجمد .. الحب بييجي ويروح المهم انت

aMiR-El ZaLaM said...

مش عارف....

ده كبرياء !! :ي


ده خـُوف ؟ :ي


طيب....

هى بتقول بينها وبين نفسها
" أنا عايزاه ومش عايزاه "

" ياترى هقدر أمنع نفسى عنه " !!

" ياترى هو هينسانى " !

طيب....

رأيى الشخصى....

يمكن هو اللى " بيحبها " أكتر شويه...

عشان كدا قادر يستحملها :ي

لسه فى حد يقدر يستحمل خُوف وكبرياء وغرور بنت !! :ي

ماعلينا...

البوست بردو حلو :)

LAMIA MAHMOUD said...

امير الظلام
هو انا كنت تقصد فعلا انه بيحبها اكتر شوية
وانها بتتدلع عليه قوي
بس برده ده ما يمنعش انها بتحبه وانه برغم كل الحب اللي بيحبوهولها مش عارف يعاملها

aMiR-El ZaLaM said...

خليها تعلمه إزاى يعاملها...


محدش بيتولد عارف يتعامل مع الناس :ي


وكل بنت ليها طريقتها اللى توصل حبيبها إزاى يعاملها " زى ماهى عايزه ":ي


تحياتى..

LAMIA MAHMOUD said...

امير الظلام
والله ما بقنا عارفين مين المفروض يعلم مين
هي بقت رخامة على الاخر

Anonymous said...

اعتقد ان الكبرياء في بعض الاحيان مفيد وليس عيب ومن الجانبين سواء المراة او الرجل بس الفكرة نفسها جميلة

Anonymous said...

الموضع جميل جداا

LAMIA MAHMOUD said...

Anonymous
الكبرياء ليس عيب او خطيئة .. ولكن شرط الا يتعدى ويصل الى مرحلة الاعتداد بالنفس
شكرا لمرورك


Anonymous
شكرا