Saturday, September 09, 2006

حكاية بنت


كل شيء ببساطة بدأ يوم ما اتولدت للأسف بنت .. وبدأت تتربى وهس عارفة ان الاب كان عايز ولد كمان لأنه ببساطة خلفة البنات بتجيب العار
***************************
اطفال صغيرين بيلعبوا سوا وهي بكل براءة: ماما عايزة انزل العب في الشارع
الام: احنا معندناش بنات تنزل تلعب في الشارع .. اتفضلي ادخلي اوضتك .. ضربة في قلبك
****************************
نكبر بقى وندخل مرحلة المراهقة .. مدرسة بنات وبس عشان الفتنة
وفي وسط المدرسة البنات كلها بتتكلم على الحب والولاد .. وبدات بقى قلبها يتحرك يا نهار اسود دي فضيحة ولازم تخبيها عن الكل
****************************
النهاردة تمت 13 سنة .. طفلة عندها 13 سنة
الاب:مفيش دخول المدرسة السنة دي من غير الحجاب
ليلى:حجاب ليه يا بابا
الاب: زي ما انا قلت كده .. مفيش دخول المدرسة من غير الحجاب ..هي معاملة البنات كده .. امال عايزة تدوري على حل شعرك
فاكرين ليلى اللي اعتبرت حبها فضيحة ولازم تخبيها جواها .. جريت على اللي حست انها بتحبه وبقوا بيتكلموا في التليفون ،ومبقتش حاسة انها فضيحة بالعكس لقت مبرر للموضوع انا بكلمه في التليفون بس
**********************************
كارت ارهاب الاخت الكبيرة عرفت انها بتحب وبتتكلم مع حبيبها .. وقالت للأم اللي قلبت الدنيا
الام:انتي حتودي اخوكي وابوكي في داهيه
ليلى (في راسها فقط):ليه وهما مالهم بالموضوع ده
الام:انتي حتجيبي لنا العار
ليلى(برده مجرد تفكير):العار عشان بحب واحد وبكلمه في التليفون
الام: انتي عيارك فاقد وفالتة ومش عارفة انتي طالعة لمين
ليلى:ده انا بقالي سنتين بحبه وما شوفتوش
الام: هو انتي كنتي شوفتي امك وحشة عشان تعملي كده
ليلى : امي كانت بتلبس ميكرو جيب لحد ما خلفت اخويا وانا محجبة من وانا عندي 13 سنه
طبعا مش محتاجة اقول ان ليلى ما قالتش ولا رد من دول .. واتعلمت ترد بطريقتها الخاصة
بقت كل حاجة من وراهم زي ما هي عايزة وكل حاجة من قدامهم زي ما هما عايزين وبردة معملتش حاجة غلط .. بس تنازلت عن مبدا اخر بدات تقابل حبيبها وتخرج .. ما هي عيارها فالت بقى ييبقى فالت على الاقل وهي بتعمل حاجة تستاهل
******************************
ليلى دلوقتي في الجامعة .. بنت من اللي بيترسم عليهم .. بس هي بتحب وواقفة صالبة ومخلصة ووفية .. وانا مش عايزة اجرح مشاعر حد
حبيبها سابها .. لانه من حقه يعيش حياته ويعرف ناس تانية .. ما هو ما ينفعش يتقيد بيها هي بس
اتعلمت ليلى القسوة وازاي تجرح ونسيت يعني اية تحب من اساسه
**************************
ليلى حاليا..
اتعلمت تجرح كل ما حد يفكر بس يجرحها
مش عايزة حب من اساسه ما هو امرأة واحدة لا تكفي لاي سبع برمبة من الموجودين
اهلها عايزين يقلبوها بسرعة ويجوزوها .. ما هي البنت الاخيرة في العيلة اللي مش مخطوبة لسة
ليلى .. معاها ليلات تانيين عايشين نفس الليلة
معظم الليلات اللي عاشوا الحياة دي جوة البيت ما بيتكلموش برة البيت متحررين بدون قلة ادب .. مجرد اثبات للذات انهم يقدروا يتخلوا عن الدنيا
ليلات كتيييييييييييير مدخنات .. مش روشنةواللهي بس رافعة السيجارة في وش اي حد حيتافف او حيعتبرها بنت سهلة عشان السيجارة دي .. خليه يجرب وانا اطلع تيييييييييييييييييييييييت

47 comments:

Sampateek said...

نعم كلنا ليلى
نفس الظروف مع اختلافات بسيطه
لا حق ليلى فيما هو حق لادم
تجلدي يا ليلى
فيكفيكي شرف البوح و الصدق
انقضى عهد الصمت
الي الامام
بوست صادق

LAMIA MAHMOUD said...

كلبوزة لكن سمباتيك ..
وهل ينفع الصدق في زمن الزيف

Violena said...

كما تبدد الشمعة الظلام .. يبدد الصدق زمن الزيف

لتظل على صدقها

تحياتى

LAMIA MAHMOUD said...
This comment has been removed by a blog administrator.
LAMIA MAHMOUD said...

violena
اصعب صدق هو الصدق مع الذات .. ونحن نصدق مع ذاتنا
كلنا ليلى

BaTaBeeT said...

7elw el post awee ya lamia
Layla shafet keter... bas isA 7atesbet lel nas enaha a7san mn ay 7ad we2ef f tare2ha...
kolona layla fe3lan :)

LAMIA MAHMOUD said...

ان شاء الله اكيد

we2am said...

fe3lan..fe 7agat kter bte7sal le layla mn 3'er man6e2 wla lehom da3wa..ll2asaf mesh fakren en ele 3ayez ye3mel 7aga haye3melha 7ta law eh..el zaman byser..w homa mesh 3ayzen yekbaro..

bosbos said...

للاسف فعلا دي حكاية كتير من البنات
و في الاخر اللوم بس ليها لوحدها مش لاهلها ولا لظروفها

كلمه said...

mkontesh msada2 en 7ayah elbent fel mogtama3 bt3na teb2a keda ...hamdullah en elwa7ed etwalad waaaaaaald .... s7ee7 elkalam da 3`lt w s7ee7 eno betala3 mganeen w mklk3een nafsyan bs saa3t byb2a elsa7 .... da 7ta be2olak ( sok 3la banatak bs edehoim elmofta7) nice post ya m3lm ...as usual

LAMIA MAHMOUD said...

وئام
زي ما قلتي لو محطوطة في بيتكوا ومقفول عليكي بالمفتاح حتتصرفي .. واللي ليه شوق في حاجة بيعملها .. بس مين يفهم


بسبس
عارفة تتلامي لو قلتي مش حغلط عشان انتي معقدة ولو غلطتي تبقي عشان انتي غلطانة يلوموكي .. دايرة مغلقة .. حلها الوحيد طظ في اي حد


كلمة
حمد الله على السلامة الاول .. واه دي حياة البنت وصدقني مقرفة جدا بتبتدي تتعلم حاجات عمرها ما كانت متخيلة انها ممكن تتعلمها .. واللي بيتعمل سك على بناتك وولع في المفتاح

yasser said...

اسف للالفاظ
اية الموضوع المقرف دة
ليلي اللي انتي بتتكلمي عنها دي ليلي المومس ليلي العاهرة ليلي فتاه الليل ليلي اللي متربيتش ليلي اللي معندهاش لا دين ولا اخلاق
لا مش معني ان في حملة (كلنا ليلي)نلاقي في ناس عندها افكار مريضة كدة
انا معترض علي احساس ليلي بالقهر في القصة دي دي تستاهل قطم رقبتها

كــــــازنــوفــا said...

اهلا يا ليلات..

مش قادرة اقول لكم عن سعادتى بيوم.. بجد انتم أكتر من رائعين.. بس بصوا بقى على الجديد دلوقتى

اللى حاصل ان فى أصوات خارجية بدئت تتعالى، ومعظمها ضد الفكرة، لانهم ببساطة ما قرؤوش اى حاجة!!!

اولا مش عايزة دة يحبط اى حد،، عادى جدا بل و متوقع



بس فى كام ملحوظة دلوقتى:

1. رجاء عدم نشر اى بوست جديد للنهاردة على الاقل، ولا حتى التعليق على اى مدونة خارجة عن "كلنا ليلى" لا بالطيب ولا بالوحش.. خلى الباقى يبدأ يعرض وجهة نظره

2. من فضل كل ليلى تقرأ ليلى الأخر واللى كتبوا ضد او مع ليلى، عشان نفهم أكتر ونبدأ ندخل فى لغة حوار

3. كل واحدة تبدأ تفكر فى بوستات تنشر تانى يوم ما نقول تانى "ابدؤا النشر" بس تكون شبه رد للبوستات اللى نزلت "ضد الفكرة" عشان نبدأ حملة موسعة للتحاور فعلا بالعقل و المنطق وبلاش التهور و الاستخفاف زى ما عملوا..



اقرؤوا أنفسنا الاول دلوقتى،،، خدوا اليوم نقاهة من التعليقات او الكتابة يا ليلات بجد.. خلى الفكرة تنور فعلا

ابدؤوا نقد الذات،، مش كل اللى كتبناه صح،،، فى آراء ضد ليلى وصح برضو،،، لازم نحضر الرد، ونعترف بالاخطاء، مش عيب، بالعكس ح نكسب اصوات العقلاء اللى مع فكرة "ضياع حقوق المرأة فى مجتمعاتنا الشريقة

LAMIA MAHMOUD said...

حاضر

LAMIA MAHMOUD said...

ياسر
اولا اعتذارك على الالفاظ مقبول .. وانا هنا مش بقدم اكتر من صورة لبنات كتير وكان غلط منك انك توصفها بالعاهرة لانها في ولا حاجة في القصة قلنا انها ارتكبت جريمة الزنا اللي منها تقدر تقول على حد لفظ عاهرة .. ده اولا ثانيا ليلى هنا كانت كجبرة في معظم اختيارات حياتها حتى ابسط حاجة
البنت دي مش بنت بعينها .. دي مجموعة مشاهد بتحصل .. وبتاثر في نفسية البنت
وبالنسبة للافكار المريضة اللي عندي فدي انا معنديش رد فيها عليك لان كل شخص حر في رايه بس احب اقولك انك ما قريتليش اي شيء اخر ومتعرفنيش شخصيا عشان تصدر الحكم ده .. ومع ذلك شكرا جدا لزيارتك مدونتي .. واسفة لو كانت ازعجتك

أحمد ندا said...

هذا الياسر المتكلم النزق..
ما هذا الأسلوب السخيف والغبي
إن رأيت علة ما .. فانصح بالحسنى ..هذا إن كان في الكلام مأخذ
لكنك بنزقك الجاهل وتهورك الأحمق ..هاجمت وأطلقت أحكامك النهائية من قراءة متعجلة لا تنم حتى عن فهم حقيقي
أيها الياسر هذه مشاعر .. مشاكل تواجه البنات ..كل البنات مهما كان تدينها أو التزامها
والواجب ألا نقمعها ..لكن أن نعالجها ....فالخلل يعالج بمواجهته لا بتجاهله..منطق النعامة الذي يؤخرنا أن أممثالك من أنصاف المتعلمين والجهلة يعتنقونه

BaTaBeeT said...

ana mesh shayfa en laila eli fil kesa 3amalet ay 7aga 3shan yet2al 3aliha keda :-s

LAMIA MAHMOUD said...

احمد ندا
شكرا لردك .. وشكرا اكتر لقرايتك الموضوع كويس

بطابيط
ولا احنا قلنا انها هتعمل حاجة ..بس جايز فيخ وجهة نظر مش واخدين بالنا منها .. خلي عندك سعة صدر
;)

LAMIA MAHMOUD said...

ياريت يا جماعة اي حد يتفضل بالرد على ياسر .. سواء بالموافقة او بالاعتراض

مفلس افندى الرايق said...

انا قريت الموضوع عادى يعنى امال ايه تعليق الاخ ياسر عاهره مومس والكلام ده سورى يعنى الموضوع عادى جدا ولازم البنت والولد يكونوا متحررين بس فى حدود الحلال والحرام وما نتقلتش البنت ونمنع صوتها يخرج ونربيلها عقده وتعصب لحد ما يفلت زمامها مننا لان البنت لو اتمردت على الحياه ممكن تضيع وتضيع شباب كتير معاها بس مش كل حاجه نرميها على البنت لان اللى بينتج منها فى سن العشرين نتيجه ترسبات ف التربيه بس برضه فيه بنات من غير عذر بيفهموا الحريه غلط

كلمه said...

howa el2a5 yasser da m7mo2 2wykeda leh???? m7desh 2al en elbent teb2a beta3et regala w tetsarma7 fel shware3 y3ni..... bs brdo mesh hateb2a zy elkorsy 2w elmartaba msln ..... ta5od to2o2ha bas.... 3`eer keda ne2a e7na 3`altaneen

heya mtstahelsh 2tm ra2abet-ha ... heya 3yza 7d ya5od balo menha

LAMIA MAHMOUD said...

مفلس افندي الرايق
شكرا جدا انك قريت الموضوع كويس .. وشكرا اكتر لانك استوعبت اللي بناقشه .. احنا ما قلناش انها غلطت او بتطلب تغلط .. احنا قلنا بنحاول تثبت نفسها بعيد عن الاخرين والبنات اللي فاهمة الحرية غلط في بنات كتير ضدهم


كلمة
هي مش عايزة حد يقطم رقابتها هي عايزة حد ياخد باله منها زي ما قلت وقبل ده كله يفهمها كبني ادم مش كبنت

gwad said...

لمياء انتى والريسة كلبوزة والنائب الاول
لعائلة الكلابيز اوسااااااا

انتوا اتكلمتوا فى نفس الموضوع تقريبا
بس بنظرة مختلفة بس انتوا لقيتوا حل
طبعا لا انتوا بقيتوا زى التلفزيون بتاع بلدنا كل يوم بيقول مشاكل بسس مش بتتحل

انا لا اقصد النقد

ولكن اخشى ان اجد التلفزيون بردة على المدونات

عذارا لو طولت عليكى

LAMIA MAHMOUD said...

جواد
المشكلة ليها طرفين يعني ما ينفعش بعد ما نعرضها نخلي طرف واحد يحلها اكيد محتاجين تدخل من الطرف التاني ونقاش عقلاني غشان نوصل لحل .. ومفيش تطويل ولا حاجة

ody911 said...

لا تنتظر أحد ... فلن يأتى أحد

بجد الأسم نفسوا جميل
ومش هعلق طبعا على كلنا ليلى
علشان إنتى عارفة رأييى إية
عاوزين نحل المشكلة مش نعقدها
والبلوج أسموا جامد وبيدل على حجات كتيير
من ضمنها
عادى بقة
أودى

Alexandra said...

ممارسة تفاصيل الحياة العادية بقت عهر في نظر البعض!! طيب الأستاذ المتضايق قوي كده شايف السيناريو المفروض يكون ازاي يعني. يعني ايه هي تفاصيل حياة البنت المؤدبة؟

LAMIA MAHMOUD said...

ody911
شكرا جدا على رايك في البلوج .. بالنسبة لكلنا ليلى بشاركك الراي .. وصدقني احنا مش بنعقدها اللي بيعقدها الناس اللي بتسب وتشتم بدون سبب

alexandra
مش عارفة فعلا .. لاني في المشاهد اللي قلتها ما قلتش غلطة واحدة ارتكبتها .. بس الاختلاف في الراي لا يفسد للود قضية انا صدقيني عندي الرغبة اني اعرف وجهة نظره بس من غير الالفاظ دي لو هو يسمح

shaimaa said...

moms eh bs w 3hrt eh w 2fkr mredt eh , eh el3bt da ...7lw el post f3ln ya lamia,w laila w 3'erha kteer bnfs elzroof s3at f3ln be3mlo el7aga el3'lt w homa 3rfeen enha 3'lt w enha bt2zyehom 2bl 2e 7d tany mn kotr el2hr ele shafoh fe 7ayethom

LAMIA MAHMOUD said...

شيماء
شكرا على الرد يا جميلة .. والله نفسي الناس تفهم .. بس يالا ..

LAMIA MAHMOUD said...

اكبر دليل على ان الاخ ياسر متعصب .. انه مقبلش التعليق اللي علقته في المدونة عنده .. برغم اني لم اوجه اي اهانات زي ما هو عمل .. ومع ذلك انا تقبلت وسيبتله الحرية وبردة حق الرد مكفول

yasser said...

لا الاخ ياسر مش متعصب ولا حاجة
بس مكنتش فاضي الكام يوم اللي فاتوا
والتعليق بتاعك نزل
انا اسف ع التعليق المتسرع اللي كتبتة ودة يمكن كان لسوء فهم او كنت مضايق او عصبي
معرفش
بس انا زودتها فعلا
زودتها بدون داعي
وانا بعتذر تاني
والتعليق السابق لا يعبر عن افكاري
او اللي كنت عايز اقولة وقتها
بالنسبة للافكار المريضة والكلام البايخ اللي قلتة
مشكلتي الازلية
اني دايما اربط بين افكار القصة وكاتبها
ودة اكير غلط
يا ريت متزعليش
وكل سنة وانتي طيبة

LAMIA MAHMOUD said...

ياسر
انا اسفة لاني قلت لفظ متعصب دي عليك وسعيدة جدا انك كررت زيارتك للمدونة وياريت ما تكونش الاخيرة
وسعيدة اكتر انك حسيت ان الالفاظ دي اتقالت بدون داعي

Hassan Mahmoud said...

والست ليلى مش بتشوف مذاكرتها ليه؟ مش بتفتح كلام ربنا ليه وتفهمه بدل ماهيه تاخد الاوامر من اهلها وبس. ماعندهاش عقل ليه للمناقشه؟ اذا مش مع اهلها تشوف صحبات كويسين تتفاهم معاهم. أكيد العالم لسه فيه ناس كويسين انما دايما الواحد بيحب يقرب للممنوع ويعاند . بداية غلطها انها محاولتش تفهم ليه اهلها بيعاملوها كده ومحاولتش تفتح حوار معاهم. وطبعا اكبر غلط ان بنت تمشى مع ولد من غير علم الاهل ومن غير علاقة واضحه وصريحه

LAMIA MAHMOUD said...

حسن محمود
للمرة المليون حنقول احنا بنعرض حالة .. وللمرة الالف حقول مش من حق اي حد انه ينصب نفسه جلاد
دي مجرد قصة .. يا تدخل لما ورائها للي عوزنا نوصله يا اما نقراها ونستمتع بهيا فقط او بلاش منها خالص .. لكن انك تنصب نفسك القاضي على ابطالها فده شيء غير مرغوب
بالنسبة بقى للي ورا القصة وحبيت اوصله اننا نقول للاهل ما يعلموش بناتهم يكدبوا واللي بيفتقد الحنان بيبحث عنه في اي مكان حتى لو حنان زائف .. تحياتي

Hassan Mahmoud said...

معلش ياستى خلى صدرك رحب وخليها مليون وواحد والف وواحد.
أنتى عارفه اذا كنت قاضى مكنش ده هايبقى كلامى وكنت هالومها وأدينها من الالف الى الياء. على كل حال اللى حبيت اوصله ليكى برضه انها ممكن تعوض الحنان ده مع صحبات كويسين. او انها تتفوق فى مجال معين او اى هوايه هيه بتحبها. مش لازم يعنى تدور على حنان زائف.

LAMIA MAHMOUD said...

حسن محمود
لاء من ناحية الصدر الرحب موجود .. وانت صح في انها ممكن تدور على الحنان ده في صاحبتها
بس انا بعرض حالة مختلفة .. حالة تميزت بالوحدة في مختلف مراحلها العمرية وحاولت اوصل ان الاهل فصلوها عن كل من هم في سنها لانها كانت دايما بتتعامل معاملة مختلفة
اكيد في شخصيات كتير زي بطلة القصة وفي شخصيات اكتر بيعتبروا ان الصداقة هي الحل وشخصيات اخرى ان العمل هو الحل هي اعتبرت ان الحب هو الحل .. واكتشفت فجاة انه زائف
بتحصل يا اخ حسن

Anonymous said...

كلنا ليلى
بس ليلى ليها مين ؟
المشكلة إننا بنتكلم في مجتمع لا يفهم الاسلام بالطريقة الصحيحة ، نحيا في عالم من المتناقضات ، يا ناس ، ده أسماء بنت ابي بكر لما أعجبت بالزبير بن العوام ، كلمت والدها بطريقة غير مباشرة ، وكان الأب من الذكاء إنه فهم بنته ، وقدر عواطفها .
هل معنى كده إن الأهالي دلوقت أكتر غيرة على التقاليد والدين من المسلمين الأوائل ؟!
الإجابة هي لأ ، طبعاً لأن في نقص في الوعي والفهم الذاتي للدين ، اتعودنا دايماً على الحلول الجاهزة والفتاوى التيك أواي ، وأصبح كل من يتكلم بالدين عالم يجب الاستماع إليه ، لأنه حتى على الرغم من أن كلنا ليلى ، إلا إن كل ليلى لما تكبر وتتجوز وتخلف بتنسى إنها كانت في يوم من الأيام ليلى
لازم نتغير ونغير ، مش بالإنحلال ولا التفريط في العادات والتقاليد ،بس ياناس نفكر شوية حتى لو كان اللي بنعمله مختلف عن الناس خليك نفسك
وفكر بعقلك مش بعقل المجتمع
مروة

LAMIA MAHMOUD said...

مروة
احييكي
الصح ان الانسان يكون مقتنع انه صح
مش انه يقنع المجتمع انه صح
هايلة واتمنى تعدد الزيارات

Anonymous said...

سؤال صغير اوى: طيب فرضا ان الانسان مقتنع انه صح وان اللى بيعمله صح بس هو فى الحيقة مش صح, يبقى ايه العمل؟

LAMIA MAHMOUD said...

Anonymous
يبقى هو حر في حياته لان محدش جيتحاسب غيره .. ومش من حق حد يحكم على تصرفات انسان ويقول هي صح ولا غلط .. الصح والغلط نسبي ما بين طرق الحياة المختلفة .. مادام ما عداش على حرية حد يبقى هو حر ومش من حق حد ينصب نفسه قاضي عليه

Anonymous said...

كلامك مش مقنع خالص
ماهو كل واحد بيسرق ولابيرتشى ولابيدخن مخدرات بيبقى شايف انه صح وبيبرر افعاله يبقى هو حر طالما مش بيتعدى على حريتى؟
احنا رجعنا تانى لقانون الغابة

اخر تعليق ليه على كلمتك
وهل ينفع الصدق فى زمن الزيف
خليها
نعيب زمانناوالعيب فينا وما لازماننا عيب سوانا

LAMIA MAHMOUD said...

هو انا جبت سيرة حاجة من المحرمات هنا .. انا بتكلم في اسلوب حياة شخصية .. انت قلت اللي بيعمل حاجة صح وهو غلط .. بنتكلم في موضوع معين .. اللي هو حياة البنت .. بناقشها .. مجيبتش سيرة ولا رشوة ولا سرقة عايز تناقش ده يبقى استنى بوست تاني بتكلم فيه عن الفساد في المجتمع .. انا اتكلمت عن طرق تربية وطرق تصرف ومساحة حرية .. مش عن مخدرات ومكافحة جريمة .. وبرده لو خدت بالك انا ما قلتش انها من حقها تغلط .. انا في الموضوع كنت بناقش تفاصيل صغيرة اوي وبسيطة اوي .. ومن حق اي بني ادم

LAMIA MAHMOUD said...

سوري نسيت اقولك ان اللي بيسرق بيتعدى على حرية اللي سرق منه .. لو خدت بالك .. طالما متعداش على حرية حد يبقى سيبوه في حاله

وهو فعلا من الواضح ان العيب فينا انا موافقاك .. طول ما في ناس بتهاجم لمجرد الهجوم
نورتني

Anonymous said...

هل فعلا نورتك؟
والله كنت عارف انك هاتقولى اللى بيسرق بيتعدى على حرية غيره
بس ماجوبتيش على اللى بيشرب مخدرات

ياستى الحرية مالهاش دخل اطلاقا بالصح
والغلط

على كل حال اسف على انى قلت البوست اللى فات تعليق اخير
خلى ده اللى بعد الاخير
وفرصه اقولك مبروك على حبك اللى لقيتيه
سلام

LAMIA MAHMOUD said...

Anonymous said...
اه على فكرة فعلا نورتني .. اي حد بيدخل وبيدي اهتمام انه يقرا ويعلق على حاجة كاتباها بينورني .. والا مكنتش حرد عليك من الاساس .. عموما حرد عليك حالا في حوار المخدرات .. بص اللي بيشرب مخدرات ده انسان اختار انه يدمر حياته .. حقه علينا النصيحة .. وحقه علينا برده اننا منزدريهوش .. دي حياته ..طالما هو مبيبوظش حياتي انا.. ثم برده رجعت تاني خرجت بره الموضوع .. احنا كنا بنتكلم في الحملة دي على فكرة حرية البنت .. وتفاصيل حياتها .. معتقدش ان ده ليه علاقة بالسرقة او شرب المخدرات .. يعني هنا اكيد مش بطلب ان يبقى مسموح للبنت انها تشرب مخدرات ولا انها يبقى مسموح لها انها تسرق .. الغلط غلط سواء كان بنت او ولد .. والشيء اللي حنسمح بيه لحد لازم نسمح بيه للتاني .. الله يبارك فيك رغم اني ملقيتش ليك تعليق على البوست ده .. ولا لقيت؟
اني واي تاني نورتني .. واتمنى منك تعليق كمان يكون فيه اسمك

Anonymous said...

فعلا 90% من البنات فى المجتمعات العربيه ليلى.
basma

LAMIA MAHMOUD said...

بسمة
دي حقيقة يا بسمة نورتيني
شكرا على زيارتك اوي