Tuesday, September 05, 2006

كل ده يا دنيا يا بنت الاية مرة واحدة

فجأة كل حاجة نازلة على دماغي صدمات .. واللي كان المفروض انه يفرح بقى يكسر .. وكل ما اقول خلاص حفوق وارمي تحصل حاجة تانية
المصائب لا تأتي فرادا .. لازم نلمهم على بعض كده .. ما اهو اصله عيب لو قعدت تفكر في مشكلة واحدة لازم نحطهم فوق بعض ونقعد نفكر

صاحبتي من كام يوم قالت لي انتي عايزة اية .. قلت لها ربع جنية وامشي انا .. البنت استغربت وقالت لي ياااااااااه ده انتي حنينة قوي ربع جنية بس
وكان ردي الوحيد ما انتي ممكن تبقي عايزة الربع جنية يجيلك جنية .. جنية ونص .. لكن الربع جنية اللي انتي عايزاه مش حاييجي .. يا حرام اتخنقت مني .. بس معلش يا شوشو ما هي دي الحقيقة

دخل حياتي شخصيات غريبة مش فاهمالهم عايزين يقولوا اية .. واحد يقولك انتي اختي وتلاقيه بيتصرف وبيتكلم كلام يقلق ما تفهميلوش .. اللي هي اختك منين يا عم الحاج اللي انت بتقوله ده ترضى حد يقوله لاختك .. بس ما علينا الزوق في التامل واجب مادام الاخ بيقول احنا اخوات .. يبقى نصد ونعمل عبط .. وردوا على قد السؤال

المفروض اكتب مواضيع .. وولا كلمة في دماغي عايزة تخرج .. ما انا كنت بلاعة افكار ومعنديش غير الكلام اية اللي حصل متعرفش

فجأة لقيت نفسي بعمل مقارنات عمرها ما كانت تيجي في دماغي .. مش اتغيرت .. بس الظروف عجيبة

وليه احساس الوحدة القاتل ده .. مين يستاهله ..محدش فينا والله

بس صح يا ميرو .. اعتقد ان كلنا هذا الرجل .. وانتي يا شوشو .. ادينا بنتعكز على بعض

6 comments:

sydalany-وش مكرمش said...

و فين المصايب في كده

راجعي مدونتي من حوالي 7 شهور حتشوفي المصايب اللي بتنزل مرة واحدة تحت عنوان
و مازالت الخوازيق تتوالى

LAMIA MAHMOUD said...

وش مكرمش ..
ما انا مش عايزة افسر في وش الناس .. يعني احنا حنقلبها بين الناس هنا .. برده ميصحش .. ويلمولي .. ويا عيني يا بنتي .. كفاية كلام مش مترتب ومش مفهوم

We2am said...

ya lamia..el ra7ma..kol dah?!! el borto2ana mesh beteble3 b2eshraha..enma betetfasas el awel w tet2a6a3..w fe3lan .men yestahel?! no one!!

LAMIA MAHMOUD said...

وئام
ما انا قررت ارمي الاجزاء اللي مش عاجباني في البرتقانة دي .. انتي عارفة الظروف بس اتكلكعت عليا اليومين اللي فاتوا فبطلت افكر .. بس الحمد الله .. طول ما في ناس زيك يا قمر وزي شوشو وميرو الدنيا ممكن الواحد يستحملها وادينا بنفصص البرتقانة سوا

sydalany-وش مكرمش said...

لو سمحتم لو حد فصص البرتقالة يديني حتة
و يا ريت تكون سكري عشان مش بحب البرتقال البلدي








لو بسرة مفيش مانع

LAMIA MAHMOUD said...

وش مكرمش
كيلو برتقان بسرة وصلحوا وصاية لحضرتك وفصص انت براحتك