Saturday, June 19, 2010

من غير حزازيات ومن ضمن كلام كتير


النهاردة وبعد فترة انا قررت اكتب عنك
مش عارفة ليه؟
بس يمكن لأني اكتشفت اني لحد النهاردة انا فاكرة رعشة ايديك
وضحكتك ووشك لما بيحمر قال ايييييية م الكسوف
وبصتك العبيطة جدا وبصتك الوقحة جدا
...
انا عندي سؤال مهم
انت ليه كنت فاهمني أوي كده؟

عملتها ازاي دي يعني
والنغزة اللي في قلبي دي يا ترى طبيعية؟!!
....
على تــكة ومش مظبوووط
....
كتير وانا ماشية في شوارع تشبهلك
بدور عنك وسط وشوش الناس بالغصب
آه بالغصب
وكأني بغصب البني آدمين يبقوا شبهك
عشان وهما جايين من بعيد افتكرهم انت
وازعل لما يقربوا ويطلعوا حد تاني
...
زهقت من علامات بتاخدني لحد عندك
وزهقت أكتر من ارتباطات شرطية بتفكرني بيك
ومن كتر الزهق بسب الدين لكل دول بابتسامة ود
ود مفيهوش أي اصطناع
....
شارعنا الزحمة بمشي فيه اخبط في بني آمين
يخبطوني ويقولولي سوري
وكل مرة يحصل ده
اتمنى ارفع راسي الاقيك انت االلي بتقولي
وانت بتغمز نفس
.....
نظرتي كان فيها شوية غِل
متضايقة منك أوي عشان كنت بتعرف تتعامل معايا ازاي
ومتضايقة أكتر عشان ما اديتش الخريطة دي لحد غيرك
طمعت فيها وخبيتها في درج الترسيحة
مع ابتسامتي وهدية وحيدة
...
أنا النهاردة سألت أميرة
هو انا كنت كده قبل كده؟
ردها مكانش يطمن ع الاطلاااااااق
عشان كده انا ضحكت اوي ومن قلبي
عشان الحاجات الجديدة دايما حلوة
حتى لو حلاوتها ممررة حبتين

....
اللوحة كاري جاربر

2 comments:

مُزمُز said...

يعني فعلا يا لميا انتي عديتي

النص ده مش بس رائع
النص ده ماستربيس

وانا ابصملك بالعشرة انه مفيهوش غلطة
مكتوب على تكة بس مظبوط

انا كان نفسي اجمع كل ده من جوايا واكتبه
بس انتي كده خرستيني خالص

عموما التغير واضح حتى في الكتابة الروح اللي مكتوب بيها الكلام حرة اوي وفيها لسعة غريبة وجميلة حلوة وممرة فعلا :)

بس وحياة النبي تكبير الخط شوية :D

Marwa Abdelzaher said...

لمستنى قوووى