Monday, June 20, 2011

الخروج للرجال فقط


الى كل بنت عاملة .. طالبة .. او حتى ما بتعملش حاجة وبتخرج من بيتهم
لا تركبي المواصلات العامة .. الدواء فيه سم قاتل.. سوري
قصدي بلاها مواصلات وقضيها تاكسيات .. ولا اقولك بلاش تاكسيات كمان .. قضيها كعابي .. ولا بلاش كعابي
يا بنتي اقعدي في بيتكوا وخلصي
ما هو اصل انتي لو نزلتي وركبتي الاتوبيس .. حتلاقي نفسك داخلة في علاقة اقوى من اي علاقة دخلتيها في حياتك .. حد سدغ وبلط وتنح واقف ومتنح ان ما كانش لازق فيكي وقرف ولو مش عاجبكوا اقعدوا في بيوتكوا انا عارف اية اللي خرج البنات اصلا .. كتهم البلاوي .. او يا حلوة اشتري عربية .. وليلتك سودة لو طلعتي جامدة وزعقتي .. تقفي تسمعي ابشع الالفاظ وناس تعلي صوتها وما تلاقيش يا حرام غير انك تنزلي تاخدي بقى تاكسي
تااااااااااااااااااااااااكسييييييييييييييييييييييييييييييي
ايوة يا قمر رايحة فين يا جميل
..................
طب وحتركبي ورا ليه ما تركبي قدام
لاء معلش ربنا يخليك .. بابتسامة لذجة جدا .. بس انتي متاخرة ولسة نازلة من الاتوبيس
سيجارة يا انسة
ولو بتشربي نصيحة تقولي ما بدخنش .. حتوفري على نفسك جزء كبير من المعاناة
اية يا قمر .. متجوزة يا جميل
لاء
ليه
محصلش نصيب
اية ده لسة
على جنب يا اسطى لو سمحت
اية ده احنا لسة ما وصلناش
معلش على جنب هنا حكملها كعابي
وحاولي تفلتي بقى من محاولة مسك ايد ظريفة وانتي بتحاسبي ارمي الفلوس في اي حتة بس ما تديهالوش في ايده
انزلي بقى يا حلوة خديها كعابي
ما هو كان حد واحد بس في التاكسي .. اديكي نزلتي بقى يا حلوة
واسمعي بقى .. ها يا مزة .. وتعليقات يخجل اي لسان عن ذكرها
وان كانت البنت وحشة مع الاعتراض على التعبير ده لان مفيش بنت وحشة .. بس اهي وجخة نظر عقيمة .. تسمع بقى احقر التعليقات اللي بتسيء لنفسية البنت ولو كانت حلوة نفس الكلام عادي
وده كله يا حرام عشان انتي بنت .. فتتمرمطي وما تقوليش لاء .. ولو زعقتي تبقي قليلة الادب .. بنت ايةة اللي تقف تاخد حقها من واحد بيضايقها .. ولو عيطتي تبقي مايعة ..ولو سكتي تبقي متقبلة
مش قلت لك من الاول اقعدي في البيت!!!

4 comments:

snohe said...

عندك حق يا لميا
احنا محتاجين ثوره تانيه عشان نسقط
كل مظاهر التخلف والجهل اللى فى المجتمع

نورتى مدونتك

Anonymous said...

صح يالمياء الخروج للرجال فقط علشان الاخلاق بقت مافيش والشهامه نفس الكلام والدنيا بقت غريبة او احنا اللى بقينا غرباء - عديها
ماما

maysliman said...

تصويرك للوضع على هذا الشكل مأساوي
ويبدو ان الفتيات في اغلب البلدان العربية لديهم نفس الكابوس

When The Wrong One Loves You said...

صح جدا معاناه البنت المصرية
وتسلمي يا موزه على المقال :) رائع