Tuesday, January 23, 2007

اهداء خاص

وسط اوراقي القديمة التقيت وردة حمرا .. السنين عدت عليها بس ليها في قلبي ذكرى
فتحت كتابي القديم عشان ادور على صورتك .. لقيتها .. ولقيت معاها وردة حمرا .. يا ترى فاكرها؟ .. اول مرة قابلتك وانا ميتة من الكسوف .. وواقفين جنب شبه جنينة قريبة من بيتكوا .. قطفت الوردة دي وانت بتضحك نفس الضحكة الساذجة اللي كنت بحبها اوي .. وقلتلي .. وردة حبنا.. كانت من غير ريحة .. وشكلها غريب .. بس معايا لحد النهاردة
********************
دمعة نزلت من عينيا .. فلت لو تملك ايديا .. كنت ارجع بالسنين .. نبقى تاني صغيرين .. نبقى تاني .. تاني .. تاني .. نبقى تاني صغيرين
ياااااااااااه .. لو ترجع بيا السنين .. كنت عيشت كل لحظة معاك صح .. وحسيت بطعمها في وقتها .. كنت غيرت حاجات كتير بعدتنا عن بعض .. اه ما تستغربش كان لازم اتغير زي ما كان لازم تتغير .. مش انت بس السبب .. ياااااااه .. لو نرجع لاول يوم
*******************
البراءة والطفولة وانت بتسلم عليا
طيب سلمي عليا .. انتي خايفة حتى تسلمي عليا .. يا لهوي انتي ايدك تلج كده ليه .. يا بنتي هو انتي اول مرة تعرفيني .. ولا عشان بقينا بنحب بعض يعني .. يا لهوي وشك ضرب احمر عشان فلت بنحب بعض .. طيب جربي كده تقوليلي بحبك .. قوليهالي وانا واقف قدامك .. سرحتي في اية
ما سرحتش ولا حاجة .. معاك اهو
على طول؟
نعم؟
معايا على طول؟
بس مطلعش على طول يا شريف .. مطلعش على طول
طيب قولي انك بتحبيني.. طيب قوليها حرف حرف
وقلتها انا وقلتلك عايزة امشي ومشيت .. لو اعرف كنت استنيت .. سمعت ردها منك .. وسمعتك بتقولها وبتعيدها .. حبيت اللحظة اكتر
**********************
واما تمسح دمعة نزلت .. دمعة نزلت من عينيا
بس يا حبيبتي .. كل البيوت فيها خناقات .. بطلي عياط عشان خاطري
بس يا حبيبتي .. هو حل الصداع انك تخبطي دماغك في اي حاجة جنبك .. عارفة كان نفسي تكوني معايا ومش معايا على التليفون .. بيقولوا الصداع بيروح بالراحة النفسية
************************
واما اقولك لو حسافر .. وانت تحلف تبقى فاكر .. واوعدك ارجع قوام .. قوام .. قوام .. تنده عليا
فاكر يوم ما كنا بنعزل .. كنت فاكرة ان ده اخر حاجة بينا ومش حعرف اشوفك تاني .. ما انا مبعرفش اخرج لوحدي .. وكمان البيت الجديد لسة مفيهوش تليفون.. قعدت اعيط .. اعيط كتير اوي وانا معاك
بس يا لميا والله لو ما بطلتي عياط حعيط
وعينيك دمعت
يعني هي دي اخر مرة حتشوفيني .. انتي ناسية انك داخلة الكلية السنة دي .. وبعدين كل اصحابك هنا وحتنزلي وحتجيلهم .. ولو مجيتيش حجيلك انا لحد عندك .. يعني هو كتير عليكي
حكلمك كل ما الاقي تليفون .. حكلمك من الشارع من عند خالتو من عند الجيران .. حكلمك وحنزل كتير .. بس ما تفتكرش اني بعيد وتحب
ضحكت ضحكتك اللي كنت بعشقها وقلتلي.. عبيطة انتي .. خلاص عشان عزلتي خلتيني حبيت واحدة تانية
***********************
كل ايام ذكرياتي فجأة رجعت بين ايديا
اوعي تعدي من قدام المكان اللي هو بيقف فيه تاني .. لو عديتي مش عارف حيصلي اية .. انا بجد حسيتني محتاجلك اوي .. مش متخيل تبعدي عني
انتي اتاخرتي ليه اوي كده على بال ما اتصلتي ؟
كنت خايفة
كنتي خايفة من اية؟
كنت خايفة مترضاش تسمعني
وانا كمان كنت خايف
كنت خايف من اية؟
كنت خايف مترجعيليش تاني
عبيط انت .. انا ما ارجعلكش تاني .. طيب واعيش ازاي
وادينا احنا الاتنين عايشين .. وادينا احنا الاتنين كتير كمان بنكون ناسيين
**************************
احلى يوم شوفتوا في حياتي .. يوم ما جبت الوردة ديا
هو مش بس يوم ما جبت الوردة .. لاء دي ايام كتير اوي
فاكر ؟
ماما قالت لي انك ما بتذاكريش .. لو جبتي النهاردة فول مارك في الامتحان بتاع الدرس حجيبلك حاجة بتحبيها
حتجيبلي اية يعني؟
وانتي مالك بقى اهي حاجة بتحبيها وخلاص
الو
ايوة
انا جبت فول مارك في الامتحان
طيب قابليني
معايا صاحبتي
هاتيها يا ستي وقابليني
ها يا سيدي فين بقى الحاجة اللي بحبها دي
الللللله شكولاتة .. مش حاكلها خالص حخليها معايا
مكلتهاش يا شريف .. بس النمل كلها .. بس الورقة لسه معايا
انا اسف
اوعى تقول انا اسف
ليه يعني؟
انت اكبر من انك تقول انا اسف
ربنا يخليكي ليا انتي بني ادمة نضيفة اوي
وانت بني ادم صافي اوي
بس اتعلمنا نجرح في بعض .. اه ما تستغربش مش انت بس .. انا كمان .. وجه اليوم اللي خليتك تقولي فيه انا اسف .. واقولك حصل خير وما اقبلش اعتذارك
انا اسفة يا شريف
********************
وسط اوراقي القديمة .. التقيت وردة حمرا .. السنين عدت عليها بس ليها في قلبي ذكرى
وردة حمرا .. وصورتك .. وغلاف الشيكولاتة .. ولفة اول هدية جيبتهالي .. وحب راح
******************
كنت دايما بقول عشان ابطل احبك لازم اكرهك .. بس النهاردة بس اكتشفت اني لا بطلت احبك ..ولا كرهتك .. مينفعش اكرهك .. كان فيه بينا ايام حلوة كتير .. ولو حصل وجرحتني فانا واثقة انك مكنتش تقصد .. مكنتش فاهم .. ما انا عارفاك اكتر من نفسك .. مش دي كلمتك .. فاهماني انتي زيادة عن اللزوم
******************
حفضل فاهماك.. وحفضل فاكراك .. وافتكر ايامك واضحك .. لاء مكنتش وحش .. مكنتش وحش خالص .. هو بس زمن مش بتاعنا .. يمكن في زمن تاني .
تروح وترجعلنا بالسلامة .. ترجع لكل الناس اللي بيحبوك .. ولحبيبتك .. ويارب يهنيك ويوفقك .. وادعيلي الاقي حب ياخدني معاه .. بس يعرف اني مش حرمي الوردة ولا الصورة .. اللي ملوش ماضي ملوش حاضر
******************
ربنا يهنيك
******************
بالاحمر اغنية ليلى غفران وسط اوراقي القديمة

55 comments:

Amira Hassan said...

بجد يا لميا ده احلو بوست قرتهولك



طبعا بعد البوست اللي كتبتهولي:)

بجد حلو اوي يا لميا

و فعلا كانت فيه ايام حلوة

على يددددددددددددددددي

LAMIA MAHMOUD said...

ميرو
بجد يا اميرة اكتر بوست انا حساه
طبعا بعد البوست اللي كتبتهولك والبوست اللي كتبته لشيماء
لاء مش حنقعد نرتب
كلهم كنت حساهم وكلهم حباهم .. بس ده عشان اكتشاف

كانت مليانة ايام حلوة .. على يدك اه.. كنت بدبسك معايا في حاجات كتير من زمان انا:)

ربنا يخليكي ليا

Anonymous said...

كنت دايما بقول عشان ابطل احبك لازم اكرهك .. بس النهاردة بس اكتشفت اني بطلت احبك .. بس مكرهتكش .. مينفعش اكرهك .. كان فيه بينا ايام حلوة كتير .. ولو حصل وجرحتني فانا واثقة انك مكنتش تقصد .. مكنتش فاهم .. ما انا عارفاك اكتر من نفسك .. مش دي كلمتك .. فاهماني انتي زيادة عن اللزوم

أنا بكيت لما قرأت الجزء ده

Anonymous said...

howa ana leh koll maru7 blog yet3ebly a3saby keda :D
rabbena yeragga3o bel salama ya looma :)

إبـراهيم ... said...

عارفة ، فيه حاجات لو علقنا عليها بنبوظـها ، دي المفروض الواحد ما يعلقش عليها بكلمـــة !!........



فعلاً كلام مكتوب من القلب !


تسلم إيدك ، ويسلم قلبك ، وإحساسـك الرااائع ده

linda said...

ياه يالمي شو فيك احساس وشو انت صافية ونقية

احلى شيء هالجملة
بس النهاردة بس اكتشفت اني بطلت احبك .. بس مكرهتكش .. مينفعش اكرهك .. كان فيه بينا ايام حلوة كتير .

بهنيك انت كتبتي احساسي بكلماتك الراقية

بهنيك وبتمنالك التوفيق يارب

Amr Ahmed said...

اقول ايه منك لله

قطعتيني

من اجمل ما قرات

ايه الجمال والاحساس ده كله

فعلا البوستات الواقعية بتكون اقرب

تحياتي ليكي

يا رائعة

LAMIA MAHMOUD said...

تهامي
انا اسفة بس اصلي كتبت حاجة حاسة بيها اوي .. وكان نفسي توصل لكل اللي يقراها اوي


ديزي
معلش يا جميلة الف سلامة عليكي من تعب الاعصاب .. يارب يا نونوش يوفقه ويرجعه بالسلامة



ابراهيم معايا
تسلم وربنا يخليك .. بس كنت عايزة اوصل حاجة لكل اللي حيقرا الكلام ده



ليندا
تعرفي اني بفرح لما بتقوليلي اني قدرت اقول حاجة انتي حساها .. عشان انتي كمان لما باجي عندك بقرا حاجات كتير انا حساها .. عايزين نبقى نقعد مرة نقارن قصة حياتنا مع بعض يمكن تطلع هي هي :)



عمرو
كلنا مننا لليه .. هو فيه حد منه لحد تاني:)
شكرا على احساسك
وبرده بحقد عليك عشان خلصت امتحانات قبلي

shimaa said...

gmeel 2wii ya lamia..bs fe3ln ama bekon 7ob bgd 3mro ma be2lb krhya
w m3 elw2t kol 27sas belkrhya w elt7amol w.. w ..bero7 w btb2a mogrd memomry w be7sl fsl ma been el2nsan eli konty m3ah w bt7beeh w been el2nsan eli btat3mli m3ah nw-da lw elzroof 7kmt en yb2a feeh t3amol-
w fe3ln b3d kol 7aga ma bthda w btro7 elwa7d byb2a 2kthr sra7a m3 nfso..ze ma enty bt2oli lw kont 3mlt 2w lw 2t3'ert "big sigh"
rbna yerg3 sherif blsalama w yewaf2o w yeb3tlk eli enty m7tagah isa

Mony The Angel said...

:|
:|
:|
eh da yabenty da..
7'aifa a3alla2 fa2ool haga tewga3ek wana msh asdy..
bgad ata3ty alby ya lamia..
msh 3arfa a2ollek eh..
bas alpost da kan keteer 3alia aweeeeeeeeeeeeeeeeeeeeeeeeeeeeeeee
eny a2raah kda marra wa7da..
fff
ffffff
ffffffff
(ffffffffff)
ffffffff
ffffff
ffff
ff
/ \
(Da almafrood bokay ward bas fashel shwaia :)

basma saghir said...

قد ايه رائع وحقيقي وجميل بجد بجد عجبني جدا مقدرش اقلك قد ايه

حسيتك فيه نسيتي الالم بس منسيتيش الحب ومعاكي حق لان الحب عمره مايتنسي خصوصا لو كان قوي بالشكل ده

احساسك بيه اكتر من رائع
دي اول زيارة وان شاء الله مش هتكون الاخيرة

سلامي ليكي

LAMIA MAHMOUD said...

شوشو
صح يا شوشو والله .. بيحصل فصل بين اللي كنتي بتحبيه واللي بتتعاملي معاه دلوقتي :)
ربنا يرجع شريف بالسلامة يارب ويوفقه.. ويارب يلاقي نفسه ويهون عليه شوية انه بعيد




موني
مش عارفة متاكدة انك لو قلتي حاجة مش حتوجعني جايز لاني حسيت ان الكلام وصلك:)
سلامة قلبك من التقطيع يا جميلة
واحلى بوكية ورد شوفتوا يا ستي متشكرين
واضح انه اتعمل فيه مجهود كبير
(K)




بيسوو
شكرا ليك .. الحب اللي بجد عمره ما يتنسي .. ولحطاته بتمسح وبتغفر اي الم .. نورت بجد .. واتمنى ما تكونشي اخر مرة

همس الليل said...

ياااااااااااه حلو اوى البوست دا اول ما دخلت ليقتو طويل كنت هختزل منو شويه واقرا المضمون لقيتنى مش بس بقراه كلو لا بقراه وبعيشو كانى بتخيلك انتى وهو وبشوف الورده وورقه الشكولاته
وبشوف دمعه زكرى فى عيونك الرقيقه
جميله اوى يا لميا بس فعلا الدنيا ياما بتنسى كتير
وفعلا يوم ما تنسى حد مش هتكرهيه ابدا لانك هتحسى انو مش موجود اصلا
بتمنالك تلاقى حبيب يقدرك فعلا وتعيشى مرتاحه على طول ان شاء الله

أخف دم said...

كل اللى اقدر اقولهولك إنى حسيت كلامك أكتر من كلام الأغنية نفسها..
روعة يا لمياء..

Anonymous said...

اية الارف ده .. انا مش عارف اقولك اية الصراحة ومطلوب من اية دلوقتي
اننا نقوله يا بختك يا شريف ولا اية


معتقدش انه لو قرا الكلام ده حتفرق معاه .. ومش عارف ليه حسيت من الكلام انك مدلوقة على الاخ شريف ده زيادة

يا بنات عيب كده

remaliza said...

مش عارفه اقول ايه غير انها جميله واحساسها جميل اوى
يعنى فعلا انا اتاثرت بيها جدا
انا بحييك يالميا

Me&U said...

صديقتي لمياء
كام هو جميل هذا البوست
فهو يحمل كم من المشاعر والاحاسيس

ولكني استشعر من هذا ببذرة رميت بعد اكلت ثمرها ومع مرور الزمن
دفنت في باطن الارض منتظرة قطرات الماء التي ستعيدها ثمرة مرة اخري
ولكن تبخرت هذة القطرات

LAMIA MAHMOUD said...

همس الليل
سعيدة اوي انك قريتيه وعشتي فيه معايا .. عشان انا كتبته عشان اكبر قدر من الناس تعيش فيه معايا
ادعيله ربنا يوفقه .. وميرسي على دعوتك ليا يا جميلة .. بس عايزة اقولك مش انا اللي رقيقة .. اللي رقيقة هي انتي الي حسيتي الكلام ده



اخف دم
شكرا ليك .. بس مشيها لميا مش لمياء
مبحبش لمياء دي بكسل اقولها:)



مجهول الهوية
يا سيدي ما تضايقش نفسك اوي كده .. ودورلك على حتة ناشفة تقعد فيها .. الكلام ضايقك اوي كده ما تسيبش تعليق
واللي الكلمتين كانو واقفين في زورك.. المدونة دي بتاعتي يعني اكتب اللي انا عايزاه واللي مش عايز يقرا يبقى وفر
واللي حيكتب كلمتين زي دول ياريت يبقى يكتب اسمه عشان ابقى عارفة انا برد على مين .. والنبي لو عايز تحقد عليه روح احقد عليه في حتة تانية




remaliza
شكرا اوي .. نورتيني



محمد خليل
هو كلامك صح اوي يا محمد .. مشاعر استنت كتير لحد ما تبخرت فعلا
ما انا قلت جايز هو زمن مش بتاعنا
شكرا على احساسك بجد

saso said...

(f)
كده يبقي الموضوع اتقفل واتداوي بجد لما توصلي لمرحلة أرقي من الغضب والكره واحساس الوحده ، تتصالحي مع الذكريات وبدل ماتعذبك تبتسمي ليها يبقي انتي بجد طويتي الصفحة
كنتي غايبة كل ده ..ومش بالقاكي بتعلقي عند حد..بس لما رجعتي رجعتي بمفاجاة حلوة اوي
انك بريئة وراقية زي ماتخيلتك تماااااام

اميرة هشام said...

علي فكرة انتي جميلة اويييييي

واحساسك في البوست ده كان عالي
عشان كدة خلاني اعيط ولمس قلبي

اميرة هشام said...

علي فكرة انتي جميلة اويييييي

واحساسك في البوست ده كان عالي
عشان كدة خلاني اعيط ولمس قلبي

Anonymous said...

مش عارف اقولك ايه يا لميا على البوست ده بس هو حلو و الله و انا مش مضايق ان احنا محصلناش نصيب سوا لأن كفاية اني عرفت شخصية محترمة زيك و رغم كل مشاكل مرت بينا احنا قدرنا نفضل اصدقاء و مخسرناش بعض و مفيش جوانا غير الخير لبعض
مفيش حاجة لما حد فينا يتاسف للتاني لو كان غلط
و انا مخنوق من النمل جدا بس عمتا ممكن ابقى ابعتلك مع اميرة شيكولاتة تانية او خديها منها مهي على طول معاها


شكرا انك اصريتي تسلمي عليا قبل ما اسافر و انك رغم كل حاجة بتتمني لي الخير في مستقبلي مع اللي انا معاها دلوقتي و انا واثق انك يوم ما هترتبطي هيكون حد سعيد جدا لانك بتعرفي تحبي بجد و تعرفي تخلي اللي ادام سعيد
و ببقولي انك مكرهتنييش فده عشان انتي مش بتعرفي تكرهي اساسا
انا بعد ما قريت الموضوع و التعليقات قلت يا خبر انا هو واحد مهم اوي كده
اشكرك يا لميا تاني
و كنت عايز اقول للي كاتب كومنت غريب ده و مش كاتب اسمه عشان الاخ اكيد جبان و انا بقوله لو راجل اطلعلي بره و اه فعلا مفرقش معايا الكلام اللي كتباه لميا عشان انا مش مستنيها تكتب الكلام ده عشان اعرف ان احنا غاليين على بعض
لميا هتساليني عرفت اللي انتي كاتبه ده منين اسئلي صاحبتك اللي فتنت عليكي انا مليش دعوة بقى

تــسنيـم said...

صعب أوي يا لمى صدقيني صعب جدا..
أنا عيطت وأنا بقرأ البوست يمكن علشان جرحي لسه طازة ويمكن علشان احنا معملناش زيك انتي وشريف، لأ إحنا اضطرينا نكره بعض ونجرح بعض علشان خاطر نعرف نبطل نحب بعض والفرق كمان إني أتمنى أرجع علشان أمسح كل حاجة لأن أي حاجة مهما كانت صغيرة بتوجعني اوووي وبتعلّم أوي.

محبتي

LAMIA MAHMOUD said...

ساسو
منورة يا جميلة .. طولتي الغيبة علينا
كده يبقى الموضوع ارقى واحلى فعلا
انتي ارق واحلى طبعااااااااااااااااان
:) .. ميرسي على الوردة .. كله داخلي بورد محدش داخل ايده فاضية المرة دي




اميرة هشام
انا اسفة اني عيطتك يا بنوتة بجد (F)
خدي الوردة دي عشان مش تعيطي
بس اقولك سر .. انا عيطت وانا بكتبه




شريف
والله يا شريف انا بشكر صاحبتي اللي فتنت عليا ايا كانت هي مين فيهم عشان كانت السبب في الكومنت ده .. اكيد يا شريف برغم اي مشاكل حصلت بينا مينفعش حد فينا يكره التاني لان برغم كل حاجة انا عارفة انك صافي من جواك اوي .. وما بتعرفش معنى للخبث
هو انا مش مبعرفش اكره هو انا مبعرفش اكره الناس الكويسة .. ربنا يوفقك في شغلك وترجعلنا بالسلامة يارب
واعتبر الشكولاتة وصلت المهم انك تكون كويس





تسنيم
بصي يا جميلة هو عشان جرحك لسة طازة فبتكرهو بعض وبتجرحوا في بعض استني الجرح ده يهدى ويروح .. واحنا كمان جرحنا في بعض وجت علينا فترة كرهنا بعض .. بس الاكيد ان يوم ما هدينا شوفنا انه مكنلوش لازمة
انا عارفة انتي عاملة ازاي ومقدرة فوق ما تتصوري .. بس ربنا يصبرك ويقويكي وتعدي

Diyaa' said...

جميل جدا لما تحسي اللي بتكتبيه
ربنا يديمها عليكي نعمة ..ويا تري فكراني ؟!
والله مش عارف أقول إيه لأنك معبرة عن كلامك أكتر من أي حد تاني ..
بس يكفي إني قريت البوست أكتر من مرة..
حاسس إن الكلام ده مريت بيه قبل كده
سلام عليكم بقي

frozen love said...

ما سرحتش ولا حاجة .. معاك اهو
على طول؟
نعم؟
معايا على طول؟


da gher kaza part bhdlony ya lamia...msh 3arf a2lk eh...bs lw eftkrty klamy leky ana 2ltlk msh ldrget elkrh..btlty 7ob bs...lkn krh s3b..ely y3b mykrhsh....tb3an lazm tshely el7agat de..enty 3rfa r2ye fe elmwdo3 da b2mart elpost bta3y bta3 shely sortk

nice post we e7sas ra23 ydl 3la ensana arw3

dead man said...

rabena yekremek be ele yefhamek zyada 3an el lezoum 2d matfhmeh zyada 3an el lezoum ...
(f)

LAMIA MAHMOUD said...

ضياء
طبعا فاكراك .. اية الغيبة دي يا ابني كنت فين؟
شكرا كده على الكلمتين الحلوين دول .. كلنا اكيد كان في في حياتنا مواقف زي كده



حامد
اقولها تاني .. بس مطلعش على طول يا حامد:)
عموما كان معاك حق اللي يحب ميكرهش.. وعارفة حوار شيلي صورتك فاكر انا قلتلك اية ساعتها:)
اديني قلتها تاني



dead man
يارب يا سيدي .. دعوات وورد هنا كمان .. بس الدعوة المرة دي عجبتني

ola salem said...

كنت عارفه وانا بقولك ازيك وقولتيلى شوفى اخر بوست وهتعرفى مالى يا علا كنت عارفه انك فيكى حاجة بس ما فيش وقت تقوليهالى او بمعنى اصح خليتينى اعرفها بشكل تانى
كنت راجعة من الامتحان وجعانة قوى وعايزة انام ولقيتك عالعادة بتهزرى ولما غبت بتقوليلى الاخت بتاكل اخواتها
انا بصراحة كنت ضعت فى غيبوبة نوم فظيعة صحيت بقى الصبح قلت يا نهاااااار لميا لميا لميا هتقتلنى واتلخبطت كالعادة يعنى وفتحت لقيت نفسى متنحة
ايه يا لميا ده
هو انتى يا اما تخلينى اضحك قوى
يا اما تخلينى اعيط قوى؟
هو ما فيش احتمالات فى النص
بس يعنى انتى ما عندكيش حلول وسط؟
عالعموم انا قعدت افكر افكر قلت يا سلام يا لميا والاحلى بقى انك جيبتى سيرة الورد الاحمر ودى بقى اجمل زهرة اتخلقت فى الوجود عشان اجمل ناس بس
بعزك قوى يا لميا

Oma said...

begad enti gamela awi awi ya lamiaa men gowa..
3arfa fe 7agat kter awi betkon madi w ra7et w feha gar7 w 2alm w 3azav kter bas fe wa2taha bas..ba3d keda betb2a gamela lma nela2i el 7ad da 7obna leeh kan bey5alena nesta7mel ay 7aga meno..w el7ob da howa elly bey5aleh zekra 7elwa ba3d keda

momken tedam3i lma teftekri w te2oli leeh da 7asl..w ezay ba3d kol el7ob elly kan beena elly 7asl da 7asl !!

bas heya el kelma el gabara

(( ELNASEB ))

be2mana wlahi el 3azem 3ayatt w ana ba2ra klamek la2eni 7aset beh awi w 7aset beki konti 3amla ezay w enti betktbeh..

a2olek 7aga 3abita kaman..ba7es en afkarek zayei awi ..enti w we2am w shaymaa w nour..ba7eb blogatko awi ma3 eni ma3rfkosh fe el 7a2i2a

enti ensana gamela gedan men gowa...ba7ebk awi begad :)

urs:we2am or u can say oma ;)

الوردة السوداء said...

بعيدا عن ان البوست جميل
وانك حساسة جدا
بقولك
متزعليش

sherif gharib said...

لميا
ياه اول مره بجد احس فيها انك بتتكلمى من جواكى قوى كده
اول مره اعرف انك جواكى كل الذكريات الحلوه ديه
اول مره احس فيها فعلا انك ممكن تشيلى و لو حتى ورده صغيره او حتى ورقه الشيكزلاته و لو لمجرد انك تحتفظى فيها
على قد ما اتضحلى حاجات كتير فيكى فى البوست ده
زادت جوايا تساولات اكتر من اى وقت تانى
و على فكره التساولات كلها خارج عنها اى اجابات لانها لازم علشان اعرفها انها تظهر زى اللى زهر منك فى البوست ده
يعنى لازم ما تبقاش عن طريق سوال و جواب
تحياتى

Hamed Ibrahim said...

اسم المدونة أصلا مؤلم
ما بحبش حد يفوقني من حلمي وأملي ..
بس اسم جميل

البوست ده روعة برضه ..
لماذا خلق الله الذكريات؟!!
:(

Hamed Ibrahim said...

صحيح نسيت حاجة

كان محمد منير في حتة من أغنية كل الحاجات بيقول :

كل إللي يومها فرحته معاك بيعذبني
!!

We2am said...

enty 3arfa r2yey tab3an..ana geet hena bs esbat 7door :)

LAMIA MAHMOUD said...

علا
طبعا يا علا بالنسبة لحوار بتاكلي اخواتك فانتي فسرتيلي اية اللي حصل :)
انا بقى اني فيا حاجة .. فمش عارفة اقولك اية يا علا .. بس اي سينك اني قلتلك بما فيه الكفاية :)
واي سينك انك فهمتي ناو .. هو انا اكيد مبسوطة اني بخليكي تضحكي .. حوار بعيطك دي فانا مقصدش والله .. بس انا ممكن اكون معنديش وسط فعلا .. وبعد تفكير بردة يااااه يا سلام يا علا ;)
اعتقد انتي فاهماني




وئام او اوما:)
ربنا يخليكي يا جميلة .. ده بس من ذوقك .. عارفة انها فعلا كلمة سحرية .. انك كل ما تقعدي تفكري كده وتروحي يمين شمال وترجعي لزمان تقولي لنفسك النصيب .. وكفاية ان في يوم قبلت حد خلاني احس الاحساس ده حتى لو مش حعرف احسه تاني .. فتبقى مرة تستاهل اني افتكرها .. وعلى الاقل نتعلم لما نيجي نحب ما نتنازلش عن درجة معينة وصلينالها ونتمنى كمان نعديها .. انا يحصلي الشرف اني يكون فيا شبه من شخصيتك طبعا .. وحوصل كلامك ده لشيماء ووئام .. بس نور انا معرفهاش شخصيا .. لكن واثقة ان شيماء ووئام رايهم نفس رايي لانك من الواضح انك انسانة جميلة اوي .. نورتيني وتعالي على طول:)






الوردة السودة
شكرا ليكي جدا .. وصدقيني مش زعلانة :)
ربنا يخليكي يا جميلة




شريف غريب
والله انا مش عارفة اقولك .. بس البوست ده طلع من جوايا .. عشان كده ممكن يكون قريب مني .. بالنسبة للاسئلة فحتى لو كانت ممكن تتسال معتقدش اني حعرف ارد على اسئلة عن البوست ده



حامد ابراهيم
اسفة لو فوقتك:)
عارف من كام يوم كنت بلعب سبين ذا بوتل مع اصحابي العزاز وصاحبتي سالتني اية احلى واوحش حاجة في الحب .. فرديت عليها قلتلها .. كل اللي يومها فرحته معاك بيعذبني .. عارفة السونج وبحبها وده رايي انا كمان

نورت

LAMIA MAHMOUD said...

وئام
عارفاه يا حبيبتي .. حضورك اسعدنا:)

el2ahwagi said...

te3rafi ..?

mosh ha2dar a2ool gheer 7aga wa7da ...

ana lamma ebtadeet a2ra kont 7atet el headphones 3ala wdani webasma3 7aga wana ba2ra ...

wana ba2ra baseet la2etni shaded elsama3at men 3ala wdaani ...
makansh yenfa3 7aga takhodni men kalamik 7ata walaw men be3eed ...


3an eznik...
hab3at el comment di ... warga3 a2raha tani ....
le7ad ma2dar a7ot elsama3aat ....!!!

همس الليل said...

لميا ميرسى على دعوه التاج
على فكره عنوان مدونتى القديم اتغير


http://amoag-sa2ra.blogspot.com/
دا لينك المدونه بتاعى الجديد
وربنا يخليكى انك اصلا عملالى لينك عندك

elkamhawi said...

حلو مووووووووووت
ويا بخته يا ستى
او كان يا بخته بس برده يا بخته


انتى جميلة قوى على فكرة

LAMIA MAHMOUD said...

القهوجي
انا بجد مش عارفة اقول حاجة .. لان الكلام ده كبير اوي .. بس كل اللي اقدر اقوله ان كونك حسيته مش عبقرية مني ده بس عشان كنت حاسة كل كلمة وانا بكتبه وكان نفسي كل كلمة توصل للي بيقراها
ساعات بنتمنى حاجة اوي لدرجة انها تتحقق .. واعتقد ان دي حاجة من الحاجات القليلة اللي اتمنيتها واتحققت .. ان حد يحس بكلامي .. وادي اكتر من حد قالي انه حس .. نورتني





همس الليل
علم يا جميلة




القمحاوي
والله حوار كان يا بخته ده ممكن تبقى تقولهوله هو:)
مبسوطة ان كلامي وصلك .. ومش عارفة ارد اقول اية على على المجاملة الرقيقة دي بجد:)

sofinqoraso said...

قريت البوست أكتر من مرة لحد ما قدرت استجمع نفسى عشان أرد

كل واحد فينا عنده صندوق ذكريات قافله غالباً محتفظ فيه بأجمل ذكرياته وقافله لأسباب مختلفة
يمكن لأن معظم الذكريات دى بتقلب عليه المواجع
المواجع المصحوبة بإبتسامة
يمكن مش عايز حد غيره يشوفها
يمكن عايز ينساها

بتبجى علينا لحظات بنحس أننا لوحدنا اوى
ومهما اتكلمنا وعبرنا محدش هيحس بينا
بنفتكر الناس اللى اتعودنا انهم يحسوا بينا حتى من غير كلام
مش عارفة هل بتكون فعلاً هى مرة وحيدة فى حياتنا مش هتكرر ولا ده كلام بنقوله لنفسنا كنوع من انواع تعذيب النفس
وبنفتح صندوق الذكريات
اللى غالباً بيقلبلنا الموود لأيام كتير

معلش انا عارفة ان ردى مش مترتب او جايز بلا معنى أصلاً بس مكانش ينفع أدخل أقول حلو اوى وخلاص

بجد انتى رقيقة أوى يا لميا وإن شاء الله تحققى كل اللى انتى عايزاه

Dr. Tantawy said...

هوه طويل .. بس بصراحه يستاهل الواحد يقراه :)) تحياتي يا لملوم .. حلوه لملوم دي ههههه

smraa alnil said...

يا لهوي يا لميا علي الاحساس دة
انا عشت معاكي كل كلمة وكل حرف
دمعت في لحظاتك الحزينة وابتسمت لما كنتي بتتكسفي وبتضحكي
تعبتلك وفرحتلك
انتي بجد حد كويس اوي
ووصلتي لمرحلةانك اتصافيتي واتصالحتي مع نفسك
ربنا يرزقك يارب باللانسنان اللي يقدرك ويفهمك ويعوضك

Tamer Nabil Moussa said...

رائع البوست لميا

عايزك تعرفى ان كل شىء اسمة ونصيب ومش كل ما يحبة وينماة الانسان يحصل علية الظروف احيانا تكون اقوى مننا

اهم حاجة من نكبت جوانا ولاندم على اجمل ايام عشناها زمان ختى لو الزمن قطع بيها كفاية نعيش علة اجمل ذكريات وكل ما نفتكرها تضحك كل حاجةجوانا ضحة وابنسامة رضا بريئة

تحياتى

محمد حمدي said...

بوست رائع يا لميا بجد ...

إنتى موهوبه جدا .. أو أكيد عيشتى الأيام دى بإحساس صادق جدا

بصى ..

الى عيشك عمرك قبله منغير حب هيعيشك عمرك بعدة منغير حب ... لكن كل حاجه فى أولها صعبه ..

LAMIA MAHMOUD said...

sofinqoraso
عارفة ان من صندوق الذكريات ده بيتولد ابشع انواع الوجع .. الوجع المصحوب بابتسامة مختلطة بدمع
بتيجي لحظات بنشتاق لحضن كان بيضمنا .. لقلب كان بيحس بينا .. لعيون تدمع عشانا .. وبنفضل الصمت .ز معاكي حق والله يا بنتي ..ونفتح الصندوف عشان نخليه يواسينا .. نلاقيه بيعمل حاجتين في وقت واحد بيواسينا وبيانبنا ويقلب علينا المواجع.. وفي وقتها بنحس اننا مش حنحب تاني .. ومش حنعيش تاني .. ونقرر نعيش على ذكرى .. لحد ما ييجي حد يخبط على قلبك تاني وتفتحي الباب حبة حبة .. التعليق مش ملوش معنى ولا حاجة بالعكس خالص يا حبيبتي ده مليان معاني..شكرا ليكي اوي




طنطاوي
ربنا يكرمك .. نورت بعد غيبة .. كويسة لملوم وماله يا باشا:)





سمرا
ميرسي على مشاعرك الرقيقة يا جميلة .. وميرسي اكتر انك فهمتي المرحلة اللي بتكلم فيها :)



تامر
طبعا انا عارفة ان كل شيء قسمة ونصيب .. ولو ركزت في البوست حبة صغننين حتلاقيني بقول كده .. ان ممكن في زمن تاني .. بس نصيبنا نبعد عن بعض
وكل واحد بيكمل حياته فعلا
نورتني:)




محمد حمدي
هو مين بس اللي قال اني مش عايشة انا عايشة وميت فل و14 .. وهو كمان عايش .. وادينا احنا ال2 عايشين وادينا احنا ال2 كتير كمان بنكون ناسيين
نورت

Anonymous said...

دائما ما تنتهي تجربة القراءة لك ببحثي عن أنفاسي التي تاهت ما بين سطورك

LAMIA MAHMOUD said...

BlueMagnifier
ياااه .. مع اني عارفة انك متابع معايا دايما ومن كتير الا ان ده اول كومنت .. شكرا ليك .. شكرا على الكومنت .. وشكرا على المسيدج:)
واتمنى اني دايما اقدر اسيب فيك اثر
:)

~ Bato0ot ~ said...

gameela enty awy .. w gameel awy that u admit that u both hurted eachother !
w bgd gameeel awy el post da ..

LAMIA MAHMOUD said...

batoot
2nty 2gml .. and that's the truth their will never be one loser when love end .. good days is a food days

Masry said...

يخرب بيتك .. انا دمعت . الدنيا اتلخبطت تاني

LAMIA MAHMOUD said...

انسان
اسفة .. (وش مكسوف) .. بس دنيا اية اللي اتلخبطت ونفكر نرتبها

Anonymous said...

انا جيت اكتب تعليق مقدرتش.......... ملقيتش غير الدموع فى عينى والوجع فى قلبى سامحينى

رباب

LAMIA MAHMOUD said...

رباب
سلامتك من الوجع ومن الدموع
ليه بس ؟
عموما مستنياكي تاني في حاجة من غير دموع