Thursday, November 27, 2008

قبل أن ينتهي نوفمبر



إصرار الأشياء على التحول والتغيير طيلة الوقت يجعل من إكتشافي لشيء بوضوح نوع من أنواع تحقق المعجزات ، بعد كل هذا العمر أكتشف أنني لا احب نوفمبر .

يصر نوفمبر كل عام على المجيء ليؤلمني وأصر أنا على ألا أحمل له ضغينة معينة .. هذا العام اعتبرته القشة التي قسمت ظهر البعير وجعلتني أعلنها للجميع أنا أكره نوفمبر

تنظر لي صديقتي المقربة بعتاب وتخبرني أنه شهر ميلادها .. فأفكر أنه ربما يحاول مصالحتي فابتسم واصالح الناس والدنيا جميعا .. فيعود لعناده .. فأقرر أن اكره نوفمبر واحب صديقتي جدا واحتفل بمولدها لا بشهرها.

أنا بكره نوووووووووووووفمبر

********************

منيب يصر على اقتحام حياتي .. بحة الشجن بصوته تجعله ملائما جدا للفجوة بقلبي

"يا فرح يا هجاااااااار امتى تجينا الدار "

اتركه يخبرني وأنا أشرب في نفس الكوب .. هل تذكر؟

الكوب الذي اتفقنا سويا على أن نشرب منه .. انا هنا وانت في عنادك .. ربما تملئه الآن انت ايضا بنفس المشروب .. هل ابتسمت حينما تذكرت؟

هل عبست؟ .. أم رميته ارضا فصار مصيره الانكسار ك.................. لا شيء لن أجعلها ملحمة مليئة بعذابات النفس والبكاء على الأطلال .. أنا لا أجيد البكاء أصلا

"راكب حصان من ضي والحلم راح مش جي"

***********************

في الماضي كنت كطفلة قريبة الدموع جدا .. من السهل أن تبكيني بنظرة .. انزوي وأبكي .. كنت أبكي حتى انقطاع النفس .. لا أذكر متى توقفت عن ذلك .. متى أصبح بكائي حدث .. حدث لا يراه أحد وإن صادف علي أن ألمح في عيونهم إندهاش إن لم يفصحوا أصلا

أصبحت أمارس الارتجاف بدلا من البكاء .. وأبادل النظرات المستجدية للحنان بنظرات الاحتقار .. وأصر على أني أعلى من الدموع ودموعي أعلى من الجميع

ولكنك أبكيتني .. الغرابة يومها لم تكن في دموعي فقط بل كانت في مصدرها

أنت أبكيتني؟!!!! .. حدث بالفعل

Strange but true

أبكيتني فلم يفهم الجالسون انها دموعا .. اعتقدوا أن دخان ما قد تجاوز حدوده ودخل إلى عيني .. وضحكت أنا من خلال دموعي مؤكدة

"باكية عيون موالي ما قلت آه كان مالي .. استاهل اللي جرااااااااالي"

*****************

في حياة كل منا الجدة العجوز الطيبة .. التي تملأ حياتك بأساطيرها .. جدتي اختصتني وحدي بأسطورتها الخاصة في خفية عن أعين أطفال العائلة اللذين تركت لهم أساطير بياض الثلج والسندريلا .. اليوم من بين ذاكرتها المفقودة وغيوم ماضيها .. أراني أخشى أن الاقي نفس المصير

قد تفقد أذنا وتحيا .. قد تفقد عينا ، قدما ، يدا ، قد تفقد حتى ملامح وجهك وتحيا

أما أن تفقد ما كنت عليه فكيف تفعلها وتجرؤ أن تحيا

هو انا لو حصلي كده مين حيكون جنبي؟

أنا طبعا

"الوعد والمكتوب نمشي سكك ودروب ولا ينتهي المشوار"

********************

حينما جائتني الضحكة مكتومة كاد ان ينشق صدري من آلام الكتمان

وحينما جائتني الصرخة لم تكن بغريبة علي فابتلعتها بهدوء

وكأني ملعونة .. وكأنك اللعنة

كان علي أن أتوقع النهاية جيدا ، فالامتناع عن العشق كفر .. وليس بعد الكفر ذنب

"آآآآآآآآآآآه يا حبيب عمري وصحبتي وقمري"

*******************************

أنت عارف الشارع ده .. الشارع ده كان حاجات كتير اوي .. كان عندنا راجل بيحرس الفيلا دي اسمه عم محمود .. عم محمود كان بعد ما يصلي الفجر ينزل يشتري عيش ولنشون ويأكل الكلاب اللي في الشارع كلهم .. مكانش في كل دول في العادي بس كان بعد الفجر بييجي كلاب كتير أوي .. بابا كان بيقول حرام على عم محمود الاحسن أنه يأكل حد غلبان وأنا كنت شايفة انه شيء رائع من عم محمود إنه يعمله

يااااااااااااااه ده في كلام كتير بينا لسة ما اتقالش .. كلام حكيته وحبيت أحكيه بس محكيتهوش ليك انت

"يا ليلة عودي تاني يا ليلة كوني تاني .. ضمينا طهر وروح وردي فينا الروح"

خدينا

.

ضمينا

.

دفينا

.

دفينا

.

دفيناااااااااااااااااااااا

****************

اللوحة هي

The wait

ل

Kim Roberti

25 comments:

محمد حمدي said...

جميل جو الاساطير وقصص الناس الغريبه الممزوجه بالكلام عن شهر معين فى السنه

انتى كلامك دافى بجد

سلام

Mony The Angel said...

7elwa el tardeia elly fel2a5er de :D
ya slam law novamber bas ysal7ek w t7ebeeh :))

----------

"أنا لا أجيد البكاء أصلا"
3gabtny el da5la de..

----------

5awefteeny fel7etta de
msh mennek, bas 3aleeky

----------

the notebooke
How come aslan!

----------

ad eh 3am ma7mood da kan ragel taieb awe
rabbena ymaseeh bel5er lw kan lsa 3aish :)

-----------

ceya next weak ya lemy :love:

غادة الكاميليا said...

هو انا لو حصلي كده مين حيكون جنبي؟

.........

سؤال لم أجروؤ على سؤال أحد إياه علانية
أنا بكل خوف أسأل هذا السؤال

.......
الجاي بكرا أحلى
النص متسلسل بشكل حلو قوى يالمي
بوسة

تــسنيـم said...

كان وحش أووي بقاله كام سنــة وسيحتلوا السنة اللي فاتت واتفقتي أياميها معايا على مدى قسوته... بس السنة دي تقدري تقولي لعبتها صــح.. حايلته وداديته واترجيته يعمل حاجة تغير من قسوته

وبالرغم من انها حاجة صغنتوتة بس اعتبرتها عربون محبة


اعمليها السنة الجاية وحاولي معاه يمكا الأية تنقلب,,, ده بالنسبة لعلاقتك بنوفمبر


بس أقولك حاجة... العايط في الفايت نقصان عقل

مفيش حاجة بترجع اللي راح بس لسه قدامك فرصة تبدأي من جديد

:) بقيت حكيمة مش كده

Unknown said...

جميل اوي يالميا

عجبني بجد

ولمس معايا اوي

أحمد سليمان said...

لمياء

يظهر في أغلب الأحيان من كتاباتك
أن لك حضورا معقدا ومؤثرا في الأشياء
وللأشياء في حضورك طقوسا ومشاهد واضحة
في علاقة تفاعلية طرفاها متوتران
...
هو توتر إيجابي في الغالب على أي حال
___

تذكرت سارة ديفر/شارليز ثيرون في الفيلم
sweet november
ربما كان حضور نوفمبر فيها أو حضورها في نوفمبر هو ما صنع الثراء الدرامي في الفيلم
ويبدو لحد كبير أن هذا الذي حدث مع نصك
خصوصية الحضور في الأشياء
في رأيي
هذه هي الأسطورة
___

كلام كتير بينا لسة ما اتقالش .. كلام حكيته وحبيت أحكيه بس محكيتهوش ليك انت

لو كان رأيك أن الكلام الذي لم يقل يوما أكثر تأثيرا وجدوى على الأرجح من الذي يقال
فأنا متفق معك جدا

تحياتي

altwati said...

لمياء
إزيك
ربما لأنك مازلت أنت مازال نوفمبر هو نوفمبر

كتابة رائعة

يخرج القارئ منها بكدمات في القلب

تحياتي

frozen love said...

leko wa7sha...lool
fkrtny b7aga knt katbha esmha "november el27zaan".....2slobk lesa fe 7aga m3ya btshdny :)

angelic devil said...

لن يكون تعليقي
اطرائآ
او مديحآ
او تهليل بروعتك و ابداعك
ف أنت تعرفيه اكثر من الجميع

سأكتفي فقط
بالقراءة
مرارآ و تكرارآ
غرقآ في بديع الكلمات
و سحر الأجواء

بالمناسبة
اشاركك حبك لنقطة نور لبهاء طاهر
دمتي بحب و احترام

Unknown said...

لمياء ..
وحشتيني جدا
انا باكره شهر ابريل
من حقك تكرهي نوفمبر
زي ما من حقي اكره ابريل ..
:)
و حارس الفيلا .. راجل طيب ..
و منيب..
مابعرفش اسمعه ..
بس باحب منير ..
اوي .

LAMIA MAHMOUD said...

محمد حمدي
منورني يا محمد بعد غيبة ده اولا
تعليقك كمان دافي ميرسي يا معلم:)
____________
موني
والله يا موني نوفمبر صالحني او لاء اهو شهر وبيعدي .. كله بيعدي
بس يارب يستجيب منك ويخليكي ليا:)
دي حقيقة علمية على فكرة .. ثبت علميا ان اي حد مولود في برج الميزان واسمه لمياء محمود وبيحب يكتب ويكئبكم معاه احيانا :)) ، وعلى فكرة لازم كيون مولود في يوم عيد ميلادي ونفس الساعة وعايش في مصر .. يوووووه هو انا كنت بقول اية؟
اه اي حد فيه المواصفات دي لا يجيد البكاء .. ودوري في المراجع;)
متخافيش عليا .. انا جبل
عم محمود كان راااااائع ..بس هو الله يرحمه
سي يووووووووو
بموت فيكي
مستنية جدا:)
________________
غادة
بصي يا ستي هو كبداية بعد الشر عليييييكيييييييي بس لو كان ليا عمر فاللي حيكون جنبك انا يا غادة .. ملناش غير بعض يا سكر
قلب الحياة جواه بنورة مسحورة يا غادة
مليااااااان حاجات وبتفرح .. تخيلي!!!
:))
بوستين
________________
تسنيم
عارفة يا توتة مشكلتي اني مش بعرف اعيط في الفايت .. لو كنت بعرف يمكن كنت لما ابص ورايا مسالنيش هو ليه انا معيطش في الفايت
اما نوفمبر فعنه ما اتحايل زي ما قلت لموني .. شهر وبيعدي .. كله بيعدي
:))))
انتي حكيمة طول عمرك
_______________
اسراء
كده العدد كمل
منوريييييييييييين
:)
ربنا يكرمك ويارب اللي يكون لمس من غير اي وجع
خدي بالك منك
(K)
__________
احمد سليمان
عن تأثيري لا أدري ، أما عن طقوسي فدعني أحدثك .. مشكلتي تكمن في تلك الطقوس
توتري الايجابي
يااااااااه

اقولك سر الناس كلها عارفاه؟
انا الفيلم ده هو اكتر فيلم بعشقه
حضورها في نوفمبر :)
خصوصية الاشياء تعطيني وجها آخر لعلاقتي بنوفمبر.
الاسطورة تكمن في الداخل

قصدي ان اللي ما اتقالش كان اهم بالتأكيد
كان حيوضح .. كان حيبين .. كان حيفك
تعليقك دسسسسسسسسم
واسعدني جدا
______________
التواتي
انا تمام
وانت؟
سأصر على أن أكون أنا حتى وإن قرر نوفمبر أن يزيد من طغيانه علي
في النهاية سيمر ويتركني مقتنعة بي ومتسقة جدا معي.
لم اقصد الكدمات بقدر ما حاولت صنع العلامات
تحيات متبادلة
_______________
حامد
LooooooooooooooooooL
فينك يا رااااااااااجل
واحشنييييييييييي موووووووت يا معلم
فين ايامك فين؟
سعيدة بمجيك فوق ما تتصور وده بجد
وسعيدة أكتر إني لازلت أملك تأثيرا ما فيك
تعليقك فرحني
____________
angelic devil
بعد كل اللي قولتيه ده اقول اييييية؟
ولا ابداع ولا اي حاجة
انا بس بعرف افتكر كويس:)
بالنسبة لنقطة نور بهاء طاهر
فبهاء طاهر لا مجال للخلاف عليه حتى في غير نقطة النور
:) حاصلي الشرف لتشاركنا في حاجة يا بنوتة
_____________
شيماء علي
اكرهي ابريل .. حقك اوي .. بس برده ابريل بيعدي .. فاستمتعي بما بقى من العام
وانا سأبدأ احتفل بنهاية نوفمبر .. وابدأ استمتاعي بديسمبر ويناير ومارس وكل ما يليهم من شهور عشان ما اقولش ابريل قدامك:)
حارس الفيلا مبسوط برأيك اكيد
اسمعي اه واه من منيب
يمكن تحبيه
وانا بعششششششششق منير
ووحشاااااااااااني اوي ووحشتني تعليقاتك في اللي فات فعلا

م/ الحسيني لزومي said...

من اجل مصر
شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي
اذا كنت ترغب في وضعه علي مدونتك ارسل ميلك كي ارسل لك كود البنر
ارجو المعذرة للدخول بلا مقدمات لأني ادخل علي مئات المدونات يوميا

ست الحسن said...

ليه كده
وجعتي قلبي ربنا يسامحك

....

البوست ده انسيابي جداً وفيه سلاسة عالية ...بهدوء بيسحب البني آدم بالظبط زي متكوني فتحتى شباك بيطل ع القلب

الأغنية موفقة جداً وحتى الكلام عن عم محمود اللي يبان انه بعيد بس برده في نفس خيط الإحساس

بجد جميل
ومن أفضل الحاجات اللي كتبتيها

....

mando4ever said...

أحيانا تُجبر على السكوت....

والأسباب هتكون مختلفة....

ممكن تكون ساكت لأنك شايف انك لو اتكلمت....

المفروض انك _انت_هتتكلم كلام ليه معنى.....

ما بالك لو أن الكلام اللي هتكلم عليه.....

هو كمان محتاج كتير قوي ....

انه ياخد حقه....

ده سبب ممكن....

كمان ممكن يكون فيه مرحلة من العجز قدام التعليق.....

المرحلة اللي اكيد ساعات بتحسيها برضو...اللي هي مثلا تقفي قدام حاجة ومن كتر انبهارك ...تحسي ان لو حد طلب منك تعلقي مش هتعرفي فتقومي قالبة الصفحة على طول عشان متحسيش بالندم طول ما هي في وشك.....

ده كمان ممكن.....

......

كنت هسرح بسرعة ورا قصة حب....
واقول فيها كتير....
بس اتكعبلت فجأة في ربنا....
لقيت ازاي ربنا ادانا قدرة النسيان....
والقدرة على الذاكرة برضو....

لدرجة اني مش عارف....
حقيقي مش عارف....
هل احسنلي اني افكر كل لحظة حلوة عدت في حياتي....
واسترجع بجد فرحتي وقتها....
اكيد كان فيه ملاين من اللحظات دي....
بس في نفس الوقت هفتكر اللحظات المؤلمة.....
بكل اشكالها بقى من لحظة موت حد بيثمل حياتك لحد لحظة خوفك وانتي رايحة تجيبي نتيجة الثانوية العامة....ياااه حاجات كتير....
....
ولا ياربي ننسى....
وتعدي كل حاجة ليها فعل الوخز وننساها....
بس برضو هننسى الحاجات الحلوة ....
...
مش عارف....
حاولي تلاقي حل للمعضلة دي من غير ما تضطري ان ده ينعكس عليكي....حاولي تكوني في موقف الحكم وده هيكون صدقيني....

شوفتيه وهو بيرفع ايده في الضلمة
وبيصرخ ويقول.....
وفجأة اكون...
زي السطور...
زي السطور المليانين....
بحاجات كتيرة منورين
وانطفي في الحال
من غير سؤال
....
بالمناسبة لا أعتقد أن العالم سيتأثر كثيرا بغياب شهر نوفمبر...
العالم كدة كدة راكب عربية بتجري بسرعة للجحيم....
مش محتاج حد اساسا يحاول يختصر من وقته

Anonymous said...
This comment has been removed by a blog administrator.
Anonymous said...

don't hate it

Anonymous said...

نوفمبر المظلوم
اتداريتي من نوفمبر فاتدارى عنك
u know

LAMIA MAHMOUD said...

ست الحسن
سلامة قلبك من الوجع يا جميلة
من بعض ما عندكم يا ستي
منوراني في اول زيارة ومش حتبقى الأخيرة ومش بمزاجك على فكرة
:))
_______________
ماندو
نعمة النسيان!!!
مش عارفة .. ساعات بحس اننا مش بننسى هي بس الحاجات بتفقد قوة تأثيرها بس بتبقى فاكر انه حصل في حياتك كذا وكذا وكذا
زي ما انت قلت بالظبط ما انت لو نسيت حاجة حتنساها بحلوها ومرها .. بس لما نتجاوزها حنفتكر الحلو
اما الحيادية واني اكون حكم فعلى رأي احمد سليمان
ده مستحيل التنفيذ تقريبا
بس التجاوز سهل
شوفته انت بقى وهو بيقول
وانور فوانيييييسيييييي واملى العالم أغاااااااني
بالنسبة لالغاء نوفمبر بفكر اقدم طلب
:)
على رايك ممكن منحسش
________________
انونيموس
اوك
____________
I know
يعني حتى نوفمبر دبستني في ظلمه
مش لاعبة
:)

كرانيش said...

كم انه مظلوم هذا الشهر
انتى وتسنيم على حد سواء تقومان بظلمه
انه شهر ميلادى
ولكن لا شىء عليكما حيال هذا الامر فالحب هو حق دستورى لكل مواطن
والكره ايضا

خير خير

M.Rabie said...

دفّينا

دفّينا

دفّينا

دفّينا


-------------
bye bye UBSWEET November

rainbow said...

مشاوير الشهور
رحلات البحث وراء المعانى
تضفيرك لكلماتك بكلمات منيب او منير
كل شىء هنا يشعرنى اننا صديقتين !!0

رغم تطاير ندف البرد والحيرة الا انى المح املا دافئا يتوهج

جميل قلبك لمياء
كل سنة وانتِ بألف خير

هدى

Anonymous said...

قلت اعلق بعد 11 ما يخلص
عامه شهر 11 بيزود اضطراباتى النفسيه
جايز عشان امتحانات الترم بتكون قربت
وبعدين شهر غلس
لاهوا حر ولا هوا برد
بينى وبينه مفيش عمار بس هوا مش اكتر شهر بكره
اتعاملتى مع شهر 9
شهر الصدمات
خلى بالك منه

LAMIA MAHMOUD said...

كرانيش
حق الرفض ايضا مكفول للشهر .. لماذا لم يعكس رؤيتي؟
محدش ظالمه تسنيم صالحته اهي .. انا بس اللي مفترية عليه
______________
محمد
بااااااااااي
______________
هدى
طبعا مش محتاجة اقولك اني لما جيت عندك وقريت زاد يقيني من اننا بالفعل صديقتين

الامل
دائما ما هناك دفئا وامل يتوهج ولو مش كده حنعيش ليه امال
كل سنة وانتي طيبة
______________
انونيموس
اهو خلص .. نوفمبر شهر عجيييييب
تسعة بقى لا احمل له ضغينة ما ده بداية دراسة والناس مشغوووولة
حبقى اركز معاه كده اما نشوف
:)

أحمـــــد علـــــــى said...

حينما جائتني الضحكة مكتومة كاد ان ينشق صدري من آلام الكتمان

وحينما جائتني الصرخة لم تكن بغريبة علي فابتلعتها بهدوء

وكأني ملعونة .. وكأنك اللعنة

Not enough words to describe my feelings

LAMIA MAHMOUD said...

احمد علي
thnx gedan
:)