Tuesday, March 13, 2007

تاج من ابيتاف


طبعا بعد تاخير لظروف كانت خارجة عن ارداتي .. ولسة شايفاه النهاردة فحالا اهو حرد عليه .. عشان ابي محدش يأخرلها طلب



هل تسعد عندما يمرر لك احدهم تاج؟

اه طبعا بحس اني حد مهم يعني وفي حد افتكرني وبعت لي التاج .. ده غير ان البني ادم بيحب يتسأل وما بيصدق يقفش في فرصة يتكلم فيها عن نفسه



----------------------

هل مقدار سعادتك أو شعورك ايا كان- عند تمرير التاج لك يختلف حسب المدون الذي يمرر لك التاج؟

طبعا .. طبعا طبعا يعني .. طبعا جدا


----------------------


هل تستمتع عند إجابتك عن أسئلة التاج؟

ما انا قلتلك اي بني ادم بيقفش في اي فرصة يتكلم فيها عن نفسه .. حختلف انا ليه بقى

--------------------


هل ترى للتاج أهمية حقيقية؟

يعني .. ساعات لو في حاجات مدفونة واحنا ناويين نرد بصراحة


------------------

هل فكرت في عمل تاج خاص لك من قبل؟

خالص


-----------------

هل تفضل قراءة اجوبة التج عند المدونين الاخرين؟ أم لا تهتم سوى بالتدوينات الأخرى فقط؟

على حسب مين المدونين .. في ناس بعدي التاج وبقرا البوست .. وناس ببقى عايزة اعرف حتقول اية


-------------------------

عندما ترد على التاج ما الذي تراعيه اكثر؟

صراحة ولكن دون وقاحة

--------------------

إلى من تحرص على تمرير التاج؟

مش عارفة ليه كل ما بيجيلي تاج ببعته لكلمة .. هواية تقريبا


--------------

هل تحرص على قراءة اجابات من تمرر لهم التاج ؟ و هل تغير إجابتهم للتاج شيئا في ادراكك لهم ؟

اكيد يعني امال انا بعتاه ليه


---------------


هل تلتزم حرفيا بأسئلة التاج ؟

ايون

---------------------

ما هي نوعية التاجات التي تفضلها؟

اهي كلها اسئلة حضرتك


------------------------


تمرر التاج ده لمين؟

كلمة:)

وئام ومن سخرية القدر

انجي سمراء النيل لو مكانتش لسة عملته

انجي بطوط

موني


---------------------------


خلصت

23 comments:

بين الأمل و اليأس said...

عجبني اوي النقطه دي
عندما ترد على التاج ما الذي تراعيه اكثر؟
صراحة ولكن دون وقاحة
ينم عن انسانه محترمة راقية في تفكيرها
تحمل جمال في داخلها ولكن تخاف اخراجه بشكل هائم
الله انا اول واحد ياسلام
ايه الاحساس ده من زمان اوي مكنتش كدا
اخيرا بقيت الاول في حاجه كويسه
متنسيش ونبي المواقع زي ماقلتلك
في اللي فات
وربنا يسترها

أحمد ندا said...

:)

ody911 said...

حقيقى مش عارف أرد أقول إية ؟؟

بس متهيقى كدة إنى أقرب الناس ليكى همه إللى مررتى التاج ليهم المرادى بالزات


صح ؟؟؟


وعادى بقة
أودى

Mohamed Hamdy said...

هو أنا محدش بيمررلى تاجات ليه حرام عليكو .. دة التاج الشهير بتاع إيميلك هيروح فين لما تموت وصل لأبويا الى معندوش مدونه وموصليش !

محمد مفيد said...

حمد الله علي السلامه يا لمياء
والعوده حميدجه مع تاج ابيتاف

بنى أدم مع وقف التنفيذ said...

حمد لله ع سلامة

LAMIA MAHMOUD said...

بين الامل واليأس
شكرا لكلامك .. عنيا حاضر حسيبلك المواقع في كومنت عندك ان شاء الله
__________
احمد ندا
وماله يا بابا مش عيب
____________
اودي
هو صح ومش صح .. انا اي حد بيعلق عندي وبقراله بيبقى قريب مني نوعا .. بس في ظروف متشابهة بتجمع .. اما كلمة بقى ببعتله التاج عشان اضحك لما يرد
___________
محمد حمدي
طيب اقولك التاج ده هدية مني ليك .. ولازظم يتعمل
________
محمد مفيد
الله يسلمك .. وحشتنا تعليقات
______________
تهامي
الله يسلمك:)

أحمد ندا said...

ههههههههه..مانا باقول برضه وماله مش عيب

~ Bato0ot ~ said...

7amdelah 3ala salamtek ya lo0omy D: w thanx 3al tag ana lesa shayfah now .. w harod 3aleh isa
w egabatek kolha 7elwa w saree7a :D

elkamhawi said...

اية التاج العجيب ده

LAMIA MAHMOUD said...

ندا
ايون
_____________
بطوط
الله يسلمك يا جميلة .. يلا بقى ردي عليه:)
_____________
قمحاوي
امممممممممممممممم

No Fear said...

السلام عليكم
معلش هو تعليق مالوش دعوة بالبوست ده هو عن البوست اللي فات
هو ليه كل الناس بتقول عليه عمنا صلاح جاهين؟؟؟؟؟؟
مش عارف الحقيقة
سلام

OMA said...

ده ايه الاحترام ده
دماغك نضيفه اوي كده ليه :D
لذيذ التاج ده بس اسئلتو غريبه كده
كنت هفكر كتير لو كنت مكانك قبل مااجاوب..اسئلتو عجيبه اوي
لا بس طلعتي راقيه ودماغك نضيفه كده:)

smraa alnil said...

اتقي ربنا فيا يا بت يا لميا
هو مش في غيري يعمل ام التاجات دي
دة انا لسة عليا تاج قبل كدة ومش عملته
بقولك ايه ما تعتبري اني عملته
وحشاني يا جزمة

Human said...

تاج عن التاج ......سبحان الله ..أعتقد موضوعات التاج دي بترجع لذكاء وخبث المؤلف وساعات فيه تيجان معمولة لأشخاص بعينهم في الباطن

LAMIA MAHMOUD said...

no fear
وعليكم السلام ورحمة الله وبركاته .. تقدر تقول نوع من انواع التوقير والاحترام .. زي مثلا ما تكون بتكلم واحد صاحبك وتقوله يا باشا .. هل هو فعلا باشا؟
___________
اوما
هو انتي على طول كسفاني كده .. يا لهوي عليكي .. حتى في التاجات .. يخليكي ليا يارب:)
__________
سمرا
لاء حتعمليه بقى .. قال اعتبريني عملته قال .. وحشاكي طيب ما تتصلي ولا نسيتي الرقم .. طب انا وواحدة معهاش رصيد ومعيش رقم بيتك انتي معاكي رقم البيت والموبايل .. اغلطي واتصلي ولا مستنية نتقابل صدفة يا حلوة
__________________


Human
انا بقى نفسي اعرف مين اللي بيخترع التاجات دي .. اساسها بيجي منين:)

Ferekico .. La Talomni said...

استغربت اوي لموضوع البني ادم بيحب يتسئل ده ... شككتيني في آدميتي
:d

ert3ashat said...

7amdlillah 3la el salamaaaa....aeelt agy 3la el blog we kol mra ml2kesh 7atta topic gded le7adkda 23dt esbo3 magesh we l2et topcen marra wa7da begad enty eslobek raky gedan gedan w mdwntek 3andy 3latol fe el favourite yemke ana mb3tsh men zman bs delw2ty ana b2et mdwen 7ades we ya rab t2blony m3ako

Epitaph said...

معلهش اتأخرت
المواصلات يا اختشي
:))

شكرا علي سرعة الاستجاية
تسلميلي يا ليمي

بس ايه يا عم الهدوء و الرزانة اللي نزلوا عليك دول
LOL

:D

Mony The Angel said...

lemy :D
sorry 3alta27'eer nas wallahy al pc kaan baiez :(

bas eh da kda tedabeseeny :/
da ana mezawa3'a mn wa7ed abl kda :(
a3mel eh ana now :(

__________

7amdel 3alsalama ya gameela (F)

el2ahwagi said...

lol ana aqtare7 en kol modawen w modawenna ye3mello blog makhsoos yesamooh Tigan ... lol

7elwa eligabaat ..!

الأرمـوطــي said...

معلش انا لسه مدون جديد لكن ممكن اعرف انتم ليه سمتوه تاج

LAMIA MAHMOUD said...

فريكيكو
ممكن تكون الاستئناء اللي بيثبت القاعدة
__________
ارتعاشات
الله يسلمك .. طبعا كون في حد عارفني في ده شيء هايل وبيفرحني بجد انا كنت فاكرة اللي بيقروا ماما واحمد واتنين اصحابي:)
نورتنا
____________
ابي
دي اجل حاجة عندينا باداء محمد هنيدي
___________
موني
ولا يهمك المهم انك جيتي .. اه امال استنى حد غيري يدبسك حتى يبقى عيب:)
الله يسلمك يا قمر دايما كده داخلالي بوردة:)
____________
القهوجي
فكرت فيها اني اسيب واحدة اعمل فيها التاجا واسميها تاجات تاجات
شكرا ليك:)
_______________
الارموطي
هي جاية من tagg