Friday, October 06, 2006

اميرة قلبي

بصي بقى .. انا كنت عايزة اكتب البوست ده عبقري .. مليان بقى كلام كبير من بتاع خريطة مشاعري .. ودهاليز روحي .. وابواب العواطف وكده
بس لقيت ان ده بالذات واي كلام عنك لازم ادلقه .. مش انسقه ولا ارتبه
بحبك قوي يا اميرة
احنا اصحاب من 15 سنة مثلا .. بنبقى اصحاب ونقطع ونرجع وناتم وكده .. بس اخر فترة في ثانوي كنا متمسكين بشدة ومصرين على ان كل واحدة فينا مصرة على كره التانية .. بس انا كان مع شعور عدم الحب كان في شعور بالحنين لايام ابتدائي وايام ما كنا اصحاب
معرفش انتي اية بقى .. الا صحيح انتي كنتي حاسة باية وقتها
فاكرة بقى اول يوم حسيت فيه ان في احتمال نبقى اصحاب .. فاكرة يومها كويس كان بعد خطوبتك للاخ اللي مش عايزين نجيب سيرته تاني
وانا كنت سبت الاخ اللي يجعل كلامنا خفيف عليه
ولقيتني بتصل بيكي بقولك وراكي اية بكرة
فاكرة اليوم ده .. رحنا الاول الكلية عندك نخلص حاجات .. وبعدها طلعنا على بكري زقعدتي تتريقي عشان دفعت هناك فلوس كتير .. ورحنا كلنا كشري في هند واتمشينا في الكربة .. وروحنا على عندك ورحتي جبتيلي صورة البت اللي كنا عايزين نعلقها في المروحة فاكراها .. يجعل كلامنا خفيف عليها برده
اليوم ده حسيت ان ممكن انا وانتي نرجع اصحاب وقد كان .. التلت سنين اللي من اليوم ده لحد النهاردة
كانو احلى سنين حياتي بجد .. هونتي عليا كتير .. استمديت منك القوة في مواقف لو كنت اتعرضتلها وانتي مش جنبي كنت حنفعل ..
فاكرالك كل حاجة يا اميرة
فاكرة لما عيطت يوم خطوبة ........... وانتي خدتيني في حضنك واحتوتيني قوي مع ان موقفك حساس
فاكرالك لما شوفت في عنيكي دموع عشان انا متضايقة .. ومن غير ما اعيط حتى قومتي حضنتيني بس عشان حسيتي اني محتاجاه
وبموت فيكي لما تحسي اني مخنوقة فتقوليلي بت يا لميا انا لوحدي قومي البسي وتعالي .. اشطاط يا معلم ونقضيها بقى قعدة وبيبسي
ولما بتقفي بقى تدافعي عني قدام ناس قريبة منك قوي عشان ما يظلمونيش وتبيني انهم بيهرجوا
ولما بتقريني من غير ما اتكلم .. ولما بنتجنن سوا وبتستوعبي اي فكرة مجنونة بقولهالك
بني ادمة بجد وطيبة قوي وبحبك قوي .. لاء ما هي بحبك مش كفاية
كفاية اني اقولك ان الناس اللي كنت ممكن اعمل الدنيا كلها عشانهم بلوك وانتي قرياني بقى .. بضايق لما بيكونوا موجودين عشان معنى كده انك مش حتعرفي تبقي معايا على النت
مع اني ببقى لسة سايباكي
بتوحشيني قوي
والعبقرية بقى اني النهاردة اول ما فتحت البلوج وقلت حكتب عنك .ز دخلتي اون لاين ولقيتك بتقوليلي بت يا لميا انا بكتب بوست عنك
بجد يا بنتي انتي والبت شوشو بس دي اتكلمنا عنها قبل كده احلى حاجة في حياتي
كل سنة وانتي طيبة يا احلى اميرة
يا اميرة قلبي
واخبار منحياتك العاطفية اية .. ما هو لازم اكتب كلمة كبيرة في البوست
كل سنة وانتي طيبة يا جميلة .. بحبك قوي يا بت
اشطاط عليكي يا معلم واللي فات ده مكانش عبث وانتي عارفة من غير ما اقول

28 comments:

Amira Hassan said...

بجد انا مش عارفه اقولك ايه..

الكلام ده كبير اوي عليا

انا كمان بحبك اوي فعلا

و فعلا ببقى مبسوطه و احنا اصحاب لانك بتستوعبي جناني بقدره تحسدي عليها

و اذا كنتي تقصدي العبث اللي كنت كاتبه عنه في البلوج...فانا اظن انه فعلا عبث...و لا انتي ايه رايك يا جميله؟

ميرسي كما يجب ان يكون الميرسي

LAMIA MAHMOUD said...

ميرو
ما تقوليش عشان كل الكلام ده صح ومفيش اي حاجة كبيرة عليكي
بحبك
وبالنسبة لاستيعاب الجنان فاحنا ال2 في الهوا سوا مطرقعين ومجانين
وبالنسبة للعبث فهو بتاع البلوج اه وكان عبث فعلا
ميرسي ليكي انك في حياتي اصلا
بحبك للمرة المليون

Mahmoud Serag said...

اية العواطف الجياشة دى كلها ، كده فيه خطر أن عريس المستقبل يغير عليكى يا لمياء من أميرة .

أقولك مدام بتحبوا بعض اتجوزوا.

D-:)

Diyaa' said...

i love such posts
rbna y5lekm lb3d

LAMIA MAHMOUD said...

محمود
لاء ما تخافش عريس المستقبل استحالة يغير من اميرة ببساطة جدا لان ده شعور وده شعور تاني خالص
ولو غار يبقى مش دماغي ودماغه عبيطة
وبالنسبة بقى لحزار الجواز فاحنا 3 مش اتنين بس انت شكلك متابع المدونة قريب ترجع للشهر اللي فات
حتلاقي التالتة بتاعتنا

ضياء
يارب يكون لك حد زينا كده .. يارب ادعي من قلبك قوي

ody911 said...

مفيش شوية حب هنا يا لمياء
أصلى بجد مفتقدوا اليومين دول
وربنا يخليكوا لبعض
وعادى بقة
أودى

shaimaa said...

rbna ye5lena lb3d yarab bgd
w kfya b2a kda l7sn hnt7sd

we2am said...

ah wenabe ya gama3a el 7gat deh btetnezer 7'alo balko..w kol sana w amira tayba..w ana 3aizako te3sh2o ba3d keda 3la tol..keep it..gameel e7sasekom awe..

LAMIA MAHMOUD said...

اودي
بس انت كده بص حواليك حتلاقي اكيد حد بيحبك وانت اللي مش حاسس .. يارب فعلا يخلينا لبعض

شوشو
ربنا يخلينا بعض يارب
واه فعلا كفاية بقى كده شكلنا حنتحسد ومن ناس معينة انتي قرياني طبعا

وئام
ربنا يخليكي يا جميلة احنا حنفضل نعشق بعض ان شاء الله يارب .. وانتي طيبة يا سكر
وفعلا الحاجات دي بتتنظر انا مكنتش اعرف

مـحـمـد مـفـيـد said...

يا سيدي يا سيدي
ربنا ادام عليكم نعمه الحب ويبعد عنكم اي احقاد

LAMIA MAHMOUD said...

محمد مفيد
ياااااااااااااارب

Gbalawy said...

بجد احلى بوست قريته عن انتصارات 6 اكتوبر لمياء واميره

ربنا يديم المعروف ويخلى الثلاثى الشقى لبعض

تحياتى

LAMIA MAHMOUD said...

جبلاوي
مين ده اللي انتصر في ستة اكتوبر
ما قلنا بقى كان تهريج ما سينا لسة بتاعت اليهود
هو احلى حاجة حصلت في اكتوبر ان انا واميرة اتولدنا
وميرسي على الدعوة الحلوة دي
واللقب كمان
حبقى اقول لشوشو وميرو عليه

Diyaa' said...

يا رب يكون أدام عيني بس وميكونش مشغول زي كل الناس اللي مروا عليا
و ميبعدش
متشكر علي دعائك ده و يا رب محدش يعرف يحسدكم

أُكتب بالرصاص said...

داشما بأقول ان قلمك مبدع
رغم ان بوستاتك طويلة شوية
بس بأقرأها للنهاية

تعابير رائعة
وصورة فعلا جعلتني اندمج معها


تحياتي

زعرورة said...

احساس تحفة

لو الواحد لف الدنيا وكبر وعرف مليون شخصيه بعد كده عمر السعاده اللى ابنعرفها مع اصدقاء الطفولة اللى بيكبروا معانا ماهايتكرر الاحساس ده ابدا

شعور الطققان والخروج فجأة بدون ترتيب والاوقات الحلوة والتهييس والاوقات اللى زى الزفت والعكننة بردو ويوم حلو ويوم وحش

عارفه شعورك يا لولو عشان ليا صديقتين من 10 سنين وييي نص :D

خدى اسمعوا دى انتو التلاته بقى مش عارفه جت على بالى وانا باقرا البوست ده


http://music.6arab.com/virus-band_mestaneyak.ram


ربنا يخليكم لبعض (ورداية)

LAMIA MAHMOUD said...

ضياء
ان شاء الله حتلاقيه جنبك وقصاد عينك ومش مشغول


اكتب بالرصاص
شكرا جدا .. وبرده بيبقى في بوستات قصير عشان الناس اللي بتمل .. ربنا يخليك واتمنى يكونلك حد كده

ورداية
يارب يخليكوا لبعض يا قمر وتفضلوا سوا طول العمر
ومش بس صداقة الطفولة .. اي صداقة بجد بتبقى اروع احساس

ody911 said...

المصيبة إنى ماشى أفلى فى الناس
ومش لاقى حد يحبنى
أو حته يبصلى
عااااااااااااااا
عادى بقة
أودى

LAMIA MAHMOUD said...

اودي
ليه بس كده يا جميل
فلي كويس حتلاقي

Diyaa' said...

:d

sherif gharib said...

لمياء
انا كل يوم بكتشف حاجه جديده فى شخصيتك جميل قوى ان الانسان بفضل جواه كل المشاعر ديه لشخص تانى بالرغم من كل الظروف اللى ممكن تغير الانسان يا ريت الكل يفهم بجد ان لسه الواحد ممكن يحتاج لحد يترمى فى حضنه اكيد فيه حاجات كتيره بيبقى الاواحد عايز يقولها
بس بيكفى دمعه تغنى عن كل الكلام
يا رب يديمها عليكو
الصحوبيه اكيد مش الدمعه

saso said...

ربنا يخليكوا لبعض يا لميا
:)
اةة كل سنة وانتي طيبة لو عيد ميلادك جة.. وكل سنة وانتي طيبة يا أميرة

كلمه said...

ya saalaaaaaaaaaam 3l 7ob wel 3watef wel sadaka wel o5owaaaah wel 7alawa wel 3eshra wel ...wel ...wel ... w kol 7aga y3ni :D
nice work ya m3lm .... 3aabrty 3n nfsek 7elw 25er 7aga ....

الســـاحر said...

الله على السلوب الجميل اللى بيجيب من الاخر
وعجبنى اوى
خريطة مشاعري .. ودهاليز روحي .. وابواب العواطف وكده
خلوة بجد
ربنا يوفقك
وياريت تشرفينى بالزياره

LAMIA MAHMOUD said...

شريف
يارب كل ما تكتشف اكتر .. كل ما يعجبك اللي اكتشفته وما يجيش يوم تتصدم .. يارب يا سيدي ادعي من قلبك يديم الصداقة على الكل نعمة


ساسو
ربنا يخليكي يا قمر
وانتي طيبة عشان عيد ميلادي جه اه
ووانتي طيبة عشان عيد يملاد اميرة بالنيابة يعني


كلمة
ربنا يكرمك ده انت ابو الكلام كله

LAMIA MAHMOUD said...

الساحر
شكرا

طبيب الحب said...

حلو قوى المحبه اللى مابنكوا دى
ربنا يديمها عليكوا
وانا نفسى تزرونى فى مدونتى
اكون منون

LAMIA MAHMOUD said...

طبيب الحب
ربنا يخليك يارب ويسمع منك
اكيد حزور مدونتك وحالا